Watanzania wamtakia heri Twaha Kiduku kuelekea Pambano la Masumbwi dhidi ya Alex Kabangu toka DR Congo

 

Ayoub Mwigune

Kuelekea pambano la masumbwi kati Bondia wa ngumi za kulipwa nchini, Twaha Kiduku dhidi ya Alex Kabangu kutoka DR Congo linalotarajiwa kuchezwa siku ya Jumamosi ya March 26 katika Ukumbi Tanzanite, baadhi ya mashabiki wa mchezo huo mkoani Morogoro wamemtakia heri Kiduku katika pambano hilo.

Wakiongea na SUAMEDIA kwa nyakati tofauti Abdallah Kutta ambaye  ni dereva Bajaji,  Elly Sheshe pamoja Omary  Joseph wamesema wana uhakika Twaha Kiduku atafanya vizuri katika pambano hilo huku wakimtakia mafanikio dhidi ya  Alex Kabangu.

“Ni pambano gumu lakini naamini Kiduku atashinda  kutokana na kufanya vizuri katika mapambano yake mengi ambayo amecheza hivi karibuni hata aina ya mazoezi ambayo amekuwa akifanya”,  amesema Sheshe.

Kwa upande wake Aloyce Joseph amesema mchezo wa Jumamosi utakuwa mgumu lakini ana imani kwamba Kiduku atafanya vizuri kutokana na kupata ushirikiano mkubwa kutoka kwa wakazi wa Morogoro.

Naye Abdallah Kutta kutoka soko la Chifu Kingalu liliopo Manispaa ya Morogoro amewaomba wakazi wa mkoa huo kujitokeza kwa wingi ili kushuhudia pambano hilo huku akimuombea dua kwa Mwenyezi Mungu ili aweze kushinda.

Siku ya Jumatano Machi 23 mwaka huu bondia Twaha Kiduku alizungumza na vyombo vya habari aliapa kumtangwa bondia huyo kutoka Congo.