SUA kupanda Miti 18, 000 ya Mitiki katika kuadhimisha Wiki ya Upandaji Miti

Na: Amina Hezron

Katika kuadhimisha Wiki ya Upandaji Miti Chuo Kikuu cha Sokoine cha Kilimo (SUA) kimesema kitapanda miti 18, 000 ya Mitiki  katika eneo la Mafiga mkoani Morogoro ili kuunga juhudi za serikali katika zoezi hilo.

 

Akizungumza na SUA Media Rasi wa Ndaki ya Misitu Wanyamapori na Utalii Prof.  Suzana Augustino amesema kuwa lengo la kuchagua eneo hilo ni kutokana na aina ya miti yenyewe itakayopandwa itastawi vizuri kwa eneo hilo.

 

“Menejimenti ya chuo ilishauri kwamba miti hiyo ipandwe katika eneo kubwa ambalo baadae tunaweza kulitumia na wanafunzi wetu kwa mafunzo kwahiyo mkakati wetu lile eneo tutapanda kwa kiasi kikubwa ambacho wanafunzi wetu watakuwa wanalitumia kwa mafunzo haya ya muda mfupi wakiwa darasani wanatoka kwenda kujifunza”, alisema Prof. Suzana.

 

Aidha Prof. Suzan amewataka wananchi kujitokeza kushiriki  katika siku hiyo ya kupanda miti kwa kuwa miti hiyo si kwa ajili ya mazingira tu ila pia kwa matumizi  endelevu ya sasa na baadae.

 

“Wiki hii yote tunawakaribisha tunagawa miche bure miche ya mikaratusi na tuna miche ya mijoholo ambayo tumeotesha pale, lakini pia tuna mikangazi kwa watakao hitaji na mpaka sasa tumeshatoa miche zaidi ya 3000 kwa watu ambao wameomba kwa ajili ya kupanda na sisi tumewapatia”, alisema Prof. Suzana.