SUA yashauri dawa za Asili na za Kisasa zisichanganywe ili kupunguza athari

 Na Amina Hezron

Njombe

Serikali kupitia Mamlaka zake za uhamasishaji, uratibu, usimamizi, uendelezaji na udhibiti wa dawa asili nchini imeshauriwa kuhakikisha watengenezaji wa dawa hizo hawachanganyi dawa za asili na zile za kisasa ili kupunguza athari zinazoweza kutokea kwa watumiaji.

Ushauri huo umetolewa na Kiongozi wa Mradi wa Utafiti unaotekelezwa na Chuo Kikuu cha Sokoine cha Kilimo SUA wa Kuongeza Ubunifu katika Mimea dawa ili kuboresha Maisha (GRILI) Dkt. Faith Mabiki wakati wa mkutano mkuu wa mwaka wa wadau wa mradi huo unaoendelea mkoani Njombe.

Kiongozi wa Mradi wa Utafiti Dkt. Faith Mabiki akitoa  wasilisho lake

Dkt. Mabiki amesema lengo la kufanya tafiti hizo pamoja na Serikali ni kuhakikisha dawa za asili nchini zinakuwa bora na kufikia viwango vya kimataifa na kuweza kusafirishwa nje ya nchi  

Kwa upande wake Dkt. Doreen Ndosi kutoka SUA amesema katika wakati huu ambao dunia inakabiliana na changamoto ya usugu wa vimelea dhidi ya dawa za kisasa, ni lazima suala ya udanganyifu wa baadhi ya waganga wa tiba asili uliobainika wa kuchakachua dawa za asili na za kisasa utafutiwe ufumbuzi maana unachangia katika tatizo hilo.

Naye Kiongozi wa upimaji wa dawa asili dhidi ya virusi katika Mradi wa GRILI ambaye pia ni Mkurugenzi Mkuu wa Shirika la kuendeleza Viwanda Tanzania (TIRDO), Prof. Madundo Mtambo amependekeza tafiti zaidi zifanyike ili kuisaidia Serikali kupata Ushahidi wa kutosha na kufanya maamuzi sahihi katika suala hili linalogusa afya za binadamu na Wanyama.