Taasisi zinazohusika na sekta ya mifugo, wekeni mikakati ya kitaifa ya kusaidia vijana kujiajiri - Prof. Kambarage

 Na Hadija Zahoro

SUA

Mhadhiri Mwandamizi kutokea Chuo Kikuu cha Sokoine cha Kilimo SUA Prof. Dominic Kambarage, amezishauri taasisi zinazohusika na sekta ya mifugo, kuanzisha mikakati ya kitaifa ya kuhakikisha vijana wanaomaliza elimu katika ngazi mbalimbali, kujiajiri hadi kufikia hatua ya kuajiri wengine.

Prof. Kambarage 

Prof. Kambarage ametoa kauli hiyo wakati wa kongamano la kuadhimisha miaka 60 ya Uhuru katika Chuo Kikuu Cha Mtakatifu Augustino (SAUT) jijini Mwanza na kubeba kauli mbiu isemayo ‘Mchango wa Sekta ya Kilimo katika Maendeleo ya Tanzania: Mafanikio na Changamoto Miaka 60 Baada ya Uhuru’.

Amesema sekta ya mifugo inahitaji kufikiriwa zaidi ili iweze  kusonga mbele, kwasababu mfuko wa uwezeshaji wa kiuchumi  ulioko Halmashauri nchini haujafanya kazi vizuri ilihali, asilimia kubwa ya mapato yake inagawiwa katika makundi mbalimbali yakiwemo, walemavu asilimia 20% wakina mama  asilimia 40% na vijana asilimia 40%.

“Sekta ya mifugo ni moja ya sekta ambazo mtu anaweza kujiajiri na kuajiri wengine, mimi niombe tu SUA  na Wizara zinazohusika pamoja na watu wengine tuwe na mikakati ya kitaifa kuona jinsi  gani vijana wanawezaje kuajiriwa na kuajiri wengine, kwasababu mfuko wa uwezeshaji wa kiuchumi  ulioko katika Halmashauri haujafanya kazi vizuri sana, hivyo tunahitaji kuifikiria sekta hii ili tusonge mbele “.Amesema Prof. Kambarage.

Ameongeza kuwa idara ya maziwa na nyama pekee, haina uwezo wa kutoa fursa pana za ajira hivyo, vijana wapewe fursa hizo katika sekta ya mifugo, kilimo, uvuvi pamoja na sekta ya uzalishaji ili ziwasaidie kukuza uchumi wao pamoja na Taifa kwa ujumla.

Aidha, akitaja idadi ya ng’ombe iliyopo nchini, Prof. kambarage amesema Tanzania ina  asilimia 11% ya ng’ombe wote waliopo  Afrika na 1.7%  ya ngombe kwa ulimwengu mzima.

Ameeleza kuwa katika kaya zilizopo vijijini, ni kaya milioni 4.6 zinajihusisha na ufugaji, ambapo ni asilimia 50% ya kaya zote zilizopo nchini kote, idadi ambayo ni ndogo katika kuchangia pato la Taifa.

Prof.Kambarage ameongeza kuwa  badala ya kununua ng’ombe kutoka nchi nyingine kama vile Afrika Kusini, Tanzania inatakiwa kuwa na uzalishaji wa ng’ombe bora kwa sababu ina wataalamu wengi kutokea ngazi ya elimu ya  uzamivu (PhD), ambao wana uwezo wa kuzalisha mifugo mizuri kwa ajili ya kusambaza kwa wananchi ambapo tangu 2016 mpango huo ulikuwepo, lakini mpaka sasa haujafanyiwa kazi yoyote.

“Nchi hii tuna mifugo, lakini hatuna mifugo bora, ukisikia mtu ana mifugo mingi bora, ujue amenunua Afrika ya Kusini au Kenya sasa inakuwaje nchi kama hii ina wataalamu wenye PhD, tunashindwa kuwa na koo safi na mali nzuri, mimi naamini tuna uwezo wa kuwa na mifugo mizuri na kuisambaza kwa wananchi ” amesema Prof. Kambarage.

Ngongamano hilo la Maadhimisho ya miaka 60 ya uhuru lililokuwa limeshirikisha Chuo Kikuu cha Sokoine cha Kilimo (SUA), Chuo Kikuu cha Mwalimu Julius K. Nyerere cha Kilimo na Teknolojia, na mwenyeji Chuo Kikuu cha Mtakatifu Agustino cha Tanzania (SAUT), limelenga tathmini ya maendeleo ya nchi katika sekta mbalimbali tangu kupata uhuru wake mwaka 1961 mpaka sasa.