Hongereni SUA kuhamasisha michezo - Mhe. Kihanga

 

Na Gladness Mphuru

SUA

Bonanza la michezo ya wafanyakazi Chuo Kikuu cha Sokoine cha Kilimo (SUA) maarufu kama Chibunda Cup 2021 limefungwa rasmi na Mstahiki Meya wa Manispaa ya Morogoro, huku akipongeza menejimenti ya chuo, wafanyakazi pamoja na Benki ya CRDB na NMB kwa kudhamini mashindano hayo.

Pongezi hizo zimetolewa tarehe 10, Decemba 2021 na  Mstahiki Meya wa Manispaa ya Morogoro Mhe. Pascal Kihanga, wakati akihitimisha na kufunga bonanza hilo la michezo katika viwanja vya Kampasi ya Edward Moringe Sokoine Mkoani Morogoro

“Kwanza nichukue nafasi hii kuwapongeza sana wale wote walioshiriki katika mashindano haya inawezekana wameshiriki lakini hawakuwa washindi lakini kwangu mimi nasema wamepata faida kubwa kushiriki mashindano haya na pia nichukue nafasi kuwapongeza wadhamini wa mashindano  taasisi CRDB na NMB kwa huo ni mwanzo wa kuendelea kudhamini mashindano hayo“ alisema Mhe.  Kihanga

Aidha Mhe.  Kihanga amesema Morogoro ina vipaji vingi na SUA ni Taasisi ambayo inakusanya wanafunzi kutoka maeneo mbalimbali nchini kupitia michezo inayoendelea kuchezwa chuoni hapo itakuwa chachu ya kujenga timu imara ya Chuo, itakayoleta hamasa, huku   akifurahishwa kuona Chuo kikikumbuka timu ya zamani ya SUA ambayo iliweza kufika mbali katika mashindano mbalimbali ndani na nje ya mkoa wa Morogoro. 

Awali akizungumza kwa niaba ya Makamu Mkuu wa Chuo Kikuu cha Sokoine cha kilimo Prof. Raphael Chibunda, Naibu Makamu Mkuu wa Chuo upande wa Taaluma Prof. Maulid Mwatawala, amesema kuwa bonanza hilo lilianza Oktoba 6 2021 ambapo michezo takribani 20 ilichezwa tofauti na miaka ya nyuma

Prof. Mwatawala ameongeza kuwa dhima ya bonanza hilo ni kuwakutanisha wafanyakazi ili waweze kufahamiana, kuimarisha afya zao, kuburudika na kuibua vipaji ambavyo husaidia kufanya vizuri katika mashindano ambayo wanashiriki.

Aidha amesema mbali na hayo Chuo Kikuu Cha Sokoine Cha Kilimo Sua bado kinaendelea kuimarisha miundombinu mbalimbali kwa viwanja vya michezo, ikiwemo kwa mchezo wa kriketi na mpira wa tenisi.

“Wasomi wengi Tanzania wameweza kupata fursa ya kusoma nchini marekani na nchi zingine zilizoendelea hakika ushirikiano huu umesaidia kutoa fursa kwa vijana wetu na umeongeza ukuaji wa uchumi nchini hivyo kwa kupitia hili tunajivunia sana’’ alisema Prof. Mwatawala