Ubunifu mpya wa namna ya kuhifadhi chanjo utawanufaisha wafugaji

Na Gerald Lwomile

Simiyu

Serikali imesema sasa ina uhakika kuwa wafugaji wengi watanufaika na ubunifu mpya wa namna ya kuhifadhi chanjo katika maeneo ambayo hayana umeme, ubunifu uliofanywa na Chuo Kikuu cha Sokoine cha Kilimo SUA

Waziri wa Mifugo na Uvuvi Mhe. Luhaga Mpina akisikiliza maelezo kutoka kwa Prof. Ludovick Kazwala 

Akizungumza na SUA Media mara baada ya kutembelea banda la maonesho la Chuo hicho katika viwanja vya Nyakabindi Bariadi mkoani Simiyu Waziri wa Mifugo na Uvuvi Mhe. Luhaga Mpina amesema kwa muda mrefu kumekuwa na shida ya kuhifadhi chanjo katika maeneo ya vijijini lakini kwa kutumia ubunifu sasa wafugaji watapata huduma kwa wakati

“Tumeona ubunifu mpya wa kuhifadhi chanjo kwenye chombo kinachotengenezwa ambacho kwa vyovyote vile kina bei ya chini sana kuliko vile vifaa vingine ambavyo vinajumuisha mitungi ya gesi na wakati mwingine matengenezo makubwa…..., si kila eneo la wafugaji linakuwa na umeme hivyo hii itasaidia sana”, amesema Waziri Mpina

Awali akitoa maelezo kwa Waziri wa Mifugo na Uvuvi, Prof. Ludovick Kazwala amesema katika kuhakikisha wafugaji wananufaika na ubunifu huo watahakikisha wanashirikiana na serikali katika kuangalia uwezekano wa kusambaza ubunifu huo

Katika hatua nyingine serikali imeagiza kuwepo kwa ushirikiano wa mambo ya utafiti kati Chuo Kikuu cha Sokoine cha Kilimo SUA na Taasisi ya Utafiti Kilimo  Tanzania TARI

Waziri wa Mifugo na Uvuvi Mhe. Luhaga Mpina akisikiliza maelezo kuhusu uzalishaji wa miche ya matunda

Akizungumza katika banda la SUA Naibu Waziri wa Kilimo Mh.Hussein Bashe amesema kuwa kama SUA na TARI zitafanya kazi kwa kushirikiana anaona kutakuiwa na maendeleo makubwa ya kilimo nchini

Aidha Mh. Bashe amekishukuru Chuo Kikuu ca Sokoine cha Kilimo SUA kwa kukubali maabara zake kutumika katika kuongeza thamani ya mazao ya mbogamboga