SUA yatengeneza Wataalam wenye weledi wa kutosha ili kutatua changamoto ya upungufu wa Wataalam wa Nyuki

Na Gerald Lwomile, Simiyu

Katika kuhakikisha wafugaji wa nyuki nchini wanakuwa na elimu bora ya ufugaji, Chuo Kikuu cha Sokoine cha Kilimo SUA kimesema wataalamu watakaohitimu katika kozi mpya ya shahada inayohusu ufugaji wa nyuki watakaokuwa na weledi wa kutosha katika fani hiyo watawafikia wafugaji wengi ili kutoa elimu waliyonayo

Dkt. Nyambilila akiongea na waandishi wa habari hawapo kwenye picha juu ya kozi mpya zinazotolewa na SUA

Akizungumza kutoka katika maonesho ya kilimo Nanenane Nyakabindi mkoani Simiyu Mkurugenzi wa Kurugenzi wa Shahada za Awali kutoka SUA Dkt. Nyambilila Auri amesema kumekuwa na changamoto nyingi kwa wafugaji wa nyuki  ambazo zinaweza kumalizwa kwa kupata wahitimu waliobobea kwenye fani hiyo

“Kumekuwa na changamoto mbalimbali katika ufugaji wa nyuki kwa mfano kuchagua mahali pazuri pakufugia ili kuleta asali yenye ubora lakini pia tumeona kuna changamoto katika zao letu la asali hasa katika viwango vya kimataifa kwa hiyo kwa kusoma Shahada hii mpya ya Sayansi ya Ufugaji Nyuki na Utunzaji wa Rasilimali Nyuki tunaweza kutoa watalaamu wanaoweza kutatua changamoto hizo”, amesema Nyambilila

Akizungumzia kozi zingine Dkt. Nyambilila amesema kuwa SUA pia inataka kuongeza ufanisi kwenye fani ya ugani hivyo Chuo kimeamua kuanzisha mafunzo ya Stashahada ili watakaohitimu waende kusaidia katika shughuli za ugani

Aidha amesema SUA pia imeanzisha mafunzo ya Astashahada katika fani ya uwindaji na uongozaji wa watalii lakini pia watahakikisha mafunzo yanayotolewa yanamuwezesha mhitimu kujiajiri