SUA yakabidhi Mifuko ya Saruji 100 katika Shule ya Msingi Mlali-Morogoro

Mkuu wa Chuo Kikuu cha Sokoine cha Kilimo SUA Prof. Raphael Chibunda akikabidhi mifuko ya saruji kushoto ni Mwalimu Mkuu wa Shule ya Msingi Mlali Omary Kibukila na kulia ni Afisa Elimu Kata ya Mlali Ally Mbaraka

Chuo Kikuu cha Sokoine cha Kilimo SUA kimekabidhi mifuko ya saruji 100 yenye thamani ya sh. milioni 1.5 kwa ajili ya kuendeleza ujenzi wa vyumba 9 vya madarasa katika shule ya msingi Mlali iliyopo wilayani mvomero mkoani Morogoro ambayo kwa muda mrefu imekuwa ikabiliwa na changamoto ya upungufu wa madarasa na hivyo kupelekea wanafunzi kusomea chini ya miti.

 

Akikabidhi mifuko hiyo kwa mwalimu mkuu wa shule hiyo kwa niaba ya kamati ya ujenzi, Makamu wa Mkuu wa Chuo hicho Prof. Raphael Chibunda amesema chuo

kimeguswa na hali iliyopo shuleni hapo mara baada ya kuona wanafunzi wanasomea chini ya miti.

‘’Chuo kikuu hatuwezi kupata wanafunzi kama hawa wanafunzi hawajapita shule ya msingi utakuwa ni muujiza kwa hiyo tukadhani hilo siyo tatizo la wananchi wa

Mlali na sisi ni tatizo la kwetu, na tulichukua ni tatizo la kwetu kwanza kwa kutambua kazi kubwa inayoendelea kufanywa na serikali ya awamu ya tano chini ya Rais wetu mpendwa John Pombe Magufuli ”, alisema Prof Chibunda.

Prof. Chidunda ameongeza kuwa serikali imekuwa kifanya jitihada za dhati ili kuboresha majengo ya shule za msingi, sekondari na vyuo lengo likiwa ni kuweka mazingira bora kwa walimu kuweza kuwafundisha wanafunzi.

Aidha ameitaka kamati ya ujezi wa shule hiyo ya msingi Mlali kuhakikishainasimamia vyema matumizi ya saruji hiyo ili iweze kutumika kama ilivyo pangwana kuhakikisha madarasa hayo yanakamilika kwa wakati ili wanafunzi wapate mahala pa kujifunzia.

Akizungumza mara baada ya kupokea msaada huo Walimu Mkuu wa shule hiyo Omary Kibukila amekishukuru Chuo cha SUA kwa kutoa msaada huo na kusema shule hiyo inakabiliwa na upungufu wa madarasa 35 kati 43 yanayohitajika huku

upungufu wa matundu ya vyoo ukiwa ni matundu 35 kati ya 41 kwa wavulana na upande wa wasichana upungufu ukiwa ni matundu 51 kati ya 60 yanayohitajika.

Kwa upande wake Afisa Elimu Kata ya Mlali Mwl. Ally Mbaraka amesema halmashauri ya wilaya hiyo imeshaweka mpango wa kujenga vyumba vya madarasa tisa ifikapo mwezi wa 11 mwaka huu huku serikali kuu ikiwa tayari imetoa kiasi cha shilingi milioni 40 ambazo zitatumia kukamilisha ujezi wa madarasa pamoja na kuweka Madawati.