SUA, kupitia Kamati ya Kuthibiti Uadilifu ya SUA (KKU-SUA), yaendelea kutoa mafunzo kwa wafanyakazi wake.

 

Habari na Mwandishi wetu

Ili kuchangia katika utekelezaji wa Awamu ya Tatu (iliyoanza mwaka 2017 na itayomalizika mwaka 2022) ya Mkakati  wa Taifa wa Kupambana na Rushwa, Chuo Kikuu cha Sokoine cha Kilimo (SUA), kupitia Kamati ya Kuthibiti Uadilifu ya SUA (KKU-SUA), kimeendelea kutoa mafunzo kwa wafanyakazi wake.

Mwenyekiti wa KKU Prof. Mahonge wa pili kulia akiwa na wajumbe wa KKU na wafanyakazi walioshiriki mafunzo katika Kampasi ya Olmotonyi Arusha

Mafunzo hayo yalifanyika tarehe 18 na 19 ya mwezi Agosti mwaka 2020 katika Kampasi za SUA zilizo nje ya Mkoa wa Morogoro, yaani Kampasi ya Olmotonyi mkoani Arusha, na Kampasi ya Mazumbai mkoani Tanga.

Akizungumza katika mafunzo hayo, Mwenyekiti wa Kamati hiyo Prof. Christopher Mahonge amesema SUA imeazimia kwa dhati kuhakikisha inathibiti uadilifu na kudhibiti rushwa katika maeneo yake ya kazi.

Amesema hatua muhimu ya kwanza katika kulifikia lengo hilo, ni kuhakikisha wafanyakazi, hasa waajiriwa wapya, wanaelimishwa kuhusu kanuni na miongozo ya uadilifu kwa watumishi wa umma. Pamoja na mambo mengine, aliwaasa wafanyakazi kujiepusha na majungu katika maeneo ya kazi, na kushirikiana na kamati kwa kuwasilisha taarifa zozote za malalamiko zinazohusu chuo kutoka vyanzo mbalimbali kama vile mitandao ya kijamii, na vyombo vya habari.  

 Wajumbe wa KKU na wafanyakazi walioshiriki mafunzo katika Kampasi ya Mazumbai Lushoto

Naye Mjumbe wa kamati hiyo Dkt. Abdul Katakweba, akizungumza na wafanyakazi katika kampasi hizo kupitia wasilisho lake, amesema majukumu ya KKU ni pamoja na kuandaa na kutekeleza Mpango kazi wa mapambano dhidi ya rushwa katika taasisi. Aliongeza kuwa, majukumu mengine ya kamati ni kuandaa taarifa za utekelezaji, ufuatiliaji na tathmini za robo mwaka na mwaka na kuwasilisha kwa Kamati ya Uongozi ya Usimamizi, na kupokea, kuchambua na kushughulikia malalamiko toka ndani na nje ya Taasisi yanayotokana na ukiukwaji wa maadili.

 

Mawasilisho kutoka kwa Prof. Mahonge na Dkt. Katakweba yalitanguliwa na na maelezo ya maana za maneno matatu yaliyotumika kwenye mawasilisho, yaani Uadilifu, Rushwa na Uwajibikaji.

 

Bibi Lightness Mabula, ambaye ni mjumbe wa kamati, alitoa tafsiri ya neno uadilifu; Bw. Nicholaus Mwamtobe, ambaye pia ni Mjumbe wa kamati, akaelezea maana ya neno rushwa, wakati Prof. Mahonge alielezea maana ya neno uwajibikaji.

Baada ya mawasilisho, wafanyakazi wa Kampasi za Mazumbai na Olmotonyi walipata muda wa kujadili na kuuliza maswali na kutoa maoni yanayohusiana na masuala ya uadilifu na kupata ufafanuzi zaidi kutoka kwa wajumbe wa KKU-SUA.

Hatua inayofuata baada ya mafunzo hayo ni kuwapata wawakilishi wawili kutoka katika kila kampasi, mwanamke na mwanaume, ambao watakusanya malalamiko yahusuyo ukiukwaji wa maadili kutoka kwa wafanyakazi wanaowawakilisha na kuyawasilisha kwa KKU-SUA kwa ajili ya kufanyiwa kazi na kutafutiwa ufumbuzi.