SUAMEDIA

Na Gerald Lwomile

Makamu wa Rais wa Jamhuri ya Muungano wa Tanzania Mhe. Samiha Suluhu Hassan amesema pamoja na kazi kubwa inayofanywa na watafiti na hasa katika kuvumbua mbegu bora zenye kinga dhidi ya magonjwa pamoja na zile zinazostahimili mabadiliko ya tabia nchi lakini bado tafiti hizo haziendi kwa wananchi kwa kiwango cha kutosha

Makamu wa Rais Mhe. Samia Suluhu Hassan akitoa hotuba ya ufunguzi wa maonesho ya Nanenane (Picha zote na Gerald Lwomile)

Mama Suluhu amesema hayo leo Agosti 1, 2020 wakati akifungua maonesho ya wakulima Nanenane katika viwanja vya Nyakabindi Bariadi Mkoani Simiyu

Amesema kuwa ni muhimu watafiti wakatoa matokeo ya tafiti zao kwa Maafisa Ugani ambao ndiyo wako karibu zaidi na wananchi ambao ndiyo hasa walengwa na wazalishaji wa mazao ya kilimo, mifugo na uvuvi

Akizungumzia kilimo cha umwagiliaji, Makamu wa Rais amesema kutokana na kuwepo kwa changamoto ya mabadiliko ya tabia nchi ni muhimu kutumia umwagiliaji ambao unampa mkulima uhakika wa mavuno hata kama kuna uhaba wa mvua lakini pia Serikali itahakikisha mindombinu ya umwagiliaji inaimalishwa

“Serikali kwa kushirikiana na wadau wa sekta binafsi itahakikisha kuwa miundombinu ya umwagiliaji inajengwa na kusimamiwa vizuri……, nisisitize kuwa tuwaze unyunyiziaji na si umwagiliaji” amesema Mama Samia

Kuhusu sekta ya uvuvi, Makamu wa Rais amelaani vitendo vya baadhi ya wavuvi wanaovua samaki bila kuzingatia sheria, kanuni na taratibu zilizowekwa ili kusimamia utunzaji wa  vyanzo vya mazalia ya samaki ambapo sasa Serikali imeboresha Kanuni za Uvuvi za Mwaka 2009

Awali akimkaribisha mgeni rasmi ili kufungua maonesho hayo Waziri wa Kilimo Mhe. Japhet Hasunga amesema ili kuhakikisha kilimo kinasonga mbele ni muhimu kuwa na usimamizi thabiti wa maafisa ugani ili waende kushirikiana na wananchi kwa lengo la kutatua changamoto wanazokutana nazo katika kilimo

“Jambo jingine ni kuwekeza zaidi kwenye utafiti, maana bila utafiti ni wazi kabisa hatuwezi kuboresha kilimo chetu. Hivyo, lazima tuwekeze ipasavyo kwenye utafiti wa mambo mbalimbali yanayohusiana na kilimo” amesema Hasunga

Waziri wa Kilimo Mhe. Japhet Hasunga akitoa taarifa ya kilimo nchini kabla ya kumkaribisha Mgeni Rasmi kufungua maonesho

Maonesho ya Nanenane kitaifa yanafanyika Mkoani Simiyu na kauli mbiu ya maonesho hayo ni “Kwa Maendeleo ya Kilimo, Mifugo na Uvuvi Chagua Viongozi Bora”

Wakati huo huo banda la maonesho ya kilimo la Chuo Kikuu cha Sokoine cha Kilimo limekuwa kivutio kwa wadau mbalimbali ambao wanafika kujionea teknolojia na bunifu  mbalimbali zinazozalishwa na tafiti za SUA

Naye Naibu wa Makamu wa Mkuu wa Chuo Kikuu cha Sokoine cha Kilimo SUA, Taaluma Prof. Maulid Mwatawala ambaye amewaongoza waoneshaji wa SUA mkoani Simiyu amewataka wakazi wa Kanda ya Ziwa kuja kujionea na kushuhudia matokeo ya tafiti katika nyanja mbalimbali za Kilimo, Ufugaji na Uvuvi.

Waoneshaji kutoka SUA wakiwa katika picha ya pamoja na Naibu wa Makamu wa Mkuu wa Chuo Kikuu cha Sokoine cha Kilimo SUA, Taaluma Prof. Maulid Mwatawala wa nane kutoka kushoto

Aliyekuwa Mbunge wa Busega Mhe. Raphael Chegeni aliyevaa Kaunda Suti rangi ya maziwa akisikiliza maelezo kutoka kwa waoneshaji wa SUA aliyevaa kosia ni Prof. Rudovick Kazwala kutoka SUA