Bundi ni ndege rafiki kwa binadamu, siyo adui

Na Gerald Lwomile

Bariadi

Mkuu wa Mkoa wa Simiyu Mhe. Antony Mtaka amesema utafiti unaofanywa na Chuo Kikuu cha Sokoine cha Kilimo SUA kuhusu kutumia bundi kudhibiti wadudu waharibifu wa mazao kama panya na wengine si tu utawasaidia wakulima kuongeza mavuno lakini pia utaondoa imani potofu juu ya mnyama huyu

Bundi akiwa ndani ya boksi lililotengezwa maalum 

Akizungumza wakati akitembelea banda la Chuo Kikuu cha Sokoine cha Kilimo SUA katika viwanja vya Maonesho, Nyakabindi, Bariadi mkoani Simiyu Mtaka amesema kwa muda mrefu kumekuwa na imani kuwa ndege huyo anapotua katika eneo fulani basi eneo hilo hutokea kifo

Amesema matokeo ya utafiti huu utainufaisha jamii ya kitanzania  ukizingatia kuwa SUA inaendelea na juhudi za kueneza ubunifu huu wa kuwatumia bundi kudhibiti wadudu hai waharibifu wa mazao hususani panya na wadudu wengineo na hapana shaka ndege huyo ataonekana ni rafiki wa binadamu badala ya kuwa adui

Mkuu wa Mkoa wa Simiyu Antony Mtaka wa tatu mbele kulia akisikiliza maelezo kutoka kwa Prof. Loth Mulungu wa kwanza kulia

Akizungumzia utafiti huo, Prof. Loth Mulungu amesema kwa kawaida bundi huwa na uwezo mkubwa wa kuona wakati wa usiku na hukaa eneo la juu ili kupanua wigo wa kuona wa kutafuta chakula chake, ambapo  panya ni miongoni vya chakula chake

“Bundi mmoja anauwezo wa kula panya mmoja mpaka kumi na mbili kwa siku na  kutokana na uwezo wake wa kusafiri hadi kilomita nne (4) nasi tumekadiria kuwa anaweza kutembelea hekta 350 za mashamba sasa hiyo ndiyo faida kubwa ya bundi katika kumsaidia mkulima lakini pia anapotoa sauti yake panya hawawezi kutoka katika mashimo na kula mazao ya mkulima ” amesema Prof. Mulungu

Prof. Mulungu amesema mbali na kula panya, bundi hula wadudu wengine kama vile panzi na nzige

Akizungumzia namna ya kumvutia bundi kukaa na anabaki katika eneo la mkulima amesema ni kutengeneza masanduku yenye uwazi kama mlango hivi kwa hiyo bundi atakuwa akiingia na kutaga katika eneo hilo

“Mkulima pia anaweza kuweka kitu kama kigogo hivi kirefu katika shamba ili bundi anaposafiri kutoka kwenye kiota chake aweze kutua katika kigogo hicho na kujitafutia chakula chake” amesema Prof. Mulungu

Prof. Mulungu amewatoa hofu wakulima na wananchi na kuwambia bundi ni ndege rafiki na hivyo imani za kuwa ndege huyo anatumika kwa mambo ya usharikina zimepitwa na wakati