SUGECO, Watoa madawati na vifaa vya kufundishia vyenye thamani ya shilingi 8,500,000 katika Shule Shikizi ya Msingi Mtakuja Bwawani

Na: Tatyana Celestine.

Wakazi wa Kijiji cha Wami Dakawa Halmashauri ya Wilaya ya Mvomero mkoani Morogoro wameushukuru Ushirika wa Vijana Wahitimu wa Chuo Kikuu cha Sokoine cha Kilimo SUGECO, kwa kuwapatia madawati  na vifaa vya kufundishia vyenye thamani ya shilingi Million nane na laki tano (8,500,000/=)  katika Shule Shikizi ya Msingi Mtakuja Bwawani iliyojengwa na wahisani kwa ushirikiano na wananchi.

Akikabidhi madawati hayo Mkurugenzi wa SUGECO Revocatus Kimario amesema SUGECO imeguswa kutoa msaada huo baada ya kuona vijana wengi watokao kijijini hapo hawajui kusoma na kuandika sambamba na mazingira ya shule hiyo yasiyoridhisha ambapo wanafunzi wanalazimika kukaa chini kwa kukosa madawati.

“SUGECO tunaamini ni muda muafaka sasa shule hii shikizi kupandishwa hadhi na kusajiliwa rasmi ili iweze kuwasaidia wananchi wa eneo hili, na wito wetu kwa halmashauri ikiwapendeza kuona namna ya kuifanya shule rasmi na wadau wote wakiwemo wazazi na wananchi kuendelea kujitolea kwa hali na mali kukamilisha uwekaji wa miundombinu muhimu ili kufanikisha azma ya kuwa na shule katika eneo lao”. Alisema Kimario.

Wanafunzi wa shule shikizi ya kihonda bwawani wakifurahia madawati yaliyoletwa shuleni hapo na SUGECO baada ya kukabidhiwa shuleni hapo

Nae Mkazi wa kitongoji hicho Bwana Rajab Simba anayeishi eneo la Bwawa la Kihonda Kitongoji cha Kibao cha Ranchi amedai kuwa pamoja na uwepo wa kaya zaidi ya elfu tatu hakuna huduma muhimu za kijamii kama shule, zahanati na kwamba wanalazimika kufuata huduma kwa umbali wa zaidi ya kilomita 20.

“Kutokana na umbali kutoka hapa Bwawa la Kihonda mpaka Wami Sokoine ilipo shule ya msingi zaidi ya kilomita 25 wazazi tuliamua kuanzisha shule ambayo ni mkondo wa shule ya msingi Wami Sokoine ambapo walimu wanaofundisha ni wakujitolea kwa kulipwa na wanakijiji”, alisema Rajab Simba 

Mpaka sasa shule hiyo ina jumla ya wanafunzi 225 kuanzia awali mpaka darasa la saba, ikiwa na vyumba vitatu vya madarasa ambapo ni darasa moja pekee lililo ezekwa.

Nae Mwalimu Mkuu wa shule hiyo shikizi Betrice Masawe  amesema kwa sasa kuna walimu  saba wakujitolea na changamoto iliyopo ni umbali kutoka eneo hilo hadi ilipo shule mama ya Wami Sokoine ambako wanafunzi wa darasa la nne na saba hulazimika kuhamia huko kipindi cha mitihani ya kitaifa.

Kwa upande wake Mkuu wa Wilaya ya Mvomero Albinus Mgonya ambaye amepokea madawati hayo kwa niaba ya wananchi hao mbali na kukiri umbali uliopo kutoka eneo hilo la Bwawa la Kihonda hadi Kijiji cha Dakawa zilipo huduma za kijamii, amesema miongozo ya kusajili eneo lolote la Utawala ipo wazi akimtaka Mkurugenzi wa Halmashauri hiyo kutumia wataalam katika sekta hiyo kutoa miongozo katika utekelezaji.

“Kama ilivyo miongozo ya kusajili maeneo ya utawala, hata kwenye taratibu za kusajili shule miongozo ipo wazi nikutake Mkurugenzi uwalete wataalam wako hapa ili wawaongoze wananchi kuainisha sifa zinazohitajika ili kuona kama kuna uwezekano wa kusajili shule hii”,alisema mkuu huyo wa  Wilaya ya Mvomero.