CROSAT wakutana kujadili namna ya kukabiliana na changamoto za mabadiliko ya tabia nchi.

Na: Calvin Gwabara - Dodoma.

Wataalamu wa Sayansi za Mimea Vipando nchini wamekutana jijini Dodoma kujadili nafasi yao katika kusaidia kukabiliana na visumbufu vya mimea vinavyochagiwa na mabadiliko ya tabianchi na kuongeza uzalishaji na afya ya mlaji.

Picha ya pamoja ya baadhi ya washiriki wa mkutano wa Kisayansi wa chama cha Wataalamu wa Sayansi za mimea vipando Tanzania (CROSAT).

Akiongea kwenye mkutano huo Rais wa Chama cha Wanataaluma wa Sayansi za Mimea Vipando Tanzania (CROSAT) Prof. Kalunde Sibuga ambaye ni Mhadhiri kutoka Chuo Kikuu cha Sokoine cha Kilimo (SUA) amesema mkutano huo wa mwaka umeanza kwa mafanikio makubwa kwa kupokea mada na mawasilisho mbalimbali ya mimea vipando kupitia tafiti zinazofanyika ndani na nje ya nchi.

“Tumepokea na kujadiliana mada mbalimbali zinazohusu mimea vipando, viuatilifu, visumbufu vya mimea na mbinu za kupambana na visumbufu hivyo kwa njia ambazo hazitegemei tu madawa ya viwandani, lakini pia tumejadiliana masuala mbalimbali ya kilimo ikolojia na faida zinazotokana na kilimo hicho ikiwemo kuhifadhi bioanuai na mazingira kwa kuhakikisha tunazalisha chakula ambacho ni safi na salama”, alieleza Prof. Sibuga.

Prof. Sibuga amesema Chama hicho kinasaidia kutoa mawazo na michango chanya kwa Serikali na maendeleo ya kilimo nchini kwa kutoa mapendekezo kuhusu masuala mbalimbali ambayo yanaathiri uzalishaji na sekta ya kilimo kwa ujumla sambamba na kupokea maoni kwa wadau wengine wa kilimo ili kutatua changamoto zinazowakabili kwa kutumia sayansi.

Kwa upande Mkurugenzi wa Idara ya Uhauwilishaji wa Teknaolojia na Mahusiano kutoka Taasisi ya Utafiti wa Kilimo Tanzania (TARI) Dkt. Sophia Kashenge amesema mkutano huo ni muhimu sana kwa kuwa unawakutanisha wadau kuanzia Wakulima, Wanasayansi, watunga Sera na wadau wengine muhimu na kwamba ndani ya mkutano huo kuna mawasilisho muhimu ambayo yanalenga kutatua changamoto za uzalishaji.

“Unaweza kuona mchanganyiko mkubwa wa washiriki wa mkutano huu unasaidia sana kwenye kubadilishana mawazo ya namna ya kutatua changamoto za kilimo kwa pamoja katika mazao mbalimbali, lakini pia unasaidia kuwajengea uwezo na kuwaimarisha wanasayansi wachanga katika taaluma hiyo ya sayansi ya mazao na sisi kama TARI tunajivunia sana mkutano huu na umetoa fursa kwa watafiti wetu kueleza wanayofanya na changamoto zake kupatiwa ufumbuzi”, alisema Dkt. Kashenge.

Naye Nuhu Aman kutoka Taasisi ya Utafiti wa Kahawa nchini amesema wao kama wanasayansi wachanga wanapata nafasi ya kuvuna ujuzi kutoka kwa wanasayansi wakongwe lakini pia kupata ujuzi wa namna ya kuandika na kuwasilisha matokeo ya tafiti za kisayansi kwa jamii na wadau wengine.

“Hii ni fursa muhimu sana kwetu kama wanasayansi wachanga kwenye taaluma hii kukutana na watafiti nguli ambao wanasaidia kuboresha kazi zetu lakini pia kutuunganisha kati ya taasisi moja na nyingine, kwa kweli tunajivunia kuwa ndani ya CROSAT maana tunahudumiwa kufikia ndoto zetu” , alisema Nuhu.

Mkutano wa mwaka huu wa kisayansi umebeba kauli mbiu isemayo “Kukabiliana na Mabadiliko ya Tabianchi kwa kutumia Teknolojia za Uzalishaji wa Mazao” na umewakutanisha wadau kutoka ndani na nje ya Tanzania.

Rais wa Chama cha Wanataaluma wa Sayansi za Mimea Vipando Tanzania (CROSAT) Prof. Kalunde Sibuga akizungumza kwenye mkutano huo.

Mkurugenzi wa Idara ya Uhauwilishaji wa teknaolojia na mahusiano kutoka Taasisi ya utafiti wa kilimo Tanzania TARI Dkt. Sophia Kashenge akizungumza kwenye mkutano huo.

Naibu Makamu Mkuu wa Chuo Kikuu cha Sokoine cha Kilimo upande wa Taaluma Utafiti na Ushauri wa kitaaalamu Prof. Maulid Mwatawala akitoa wasilisho kwenye mkutano huo.