Wanafunzi wapya wa Shahada za Awali 5,663 wasajiliwa na kuthibitishwa kujiunga na SUA

 

Na: Farida Mkongwe

Chuo Kikuu cha Sokoine cha Kilimo (SUA) kimedahili jumla ya wanafunzi wapya wa Shahada za Awali 5,663 ambao wamesajiliwa na kuthibitishwa kujiunga na Chuo hicho hadi kufikia tarehe 11 Oktoba, 2024 katika mwaka wa masomo 2024/2025 huku mchakato wa kuthibishwa kwa wanafunzi waliodahiliwa kwenye zaidi ya Chuo kimoja ukiendelea.

Hayo yamebainishwa  na Makamu wa Mkuu wa Chuo hicho Prof. Raphael Chibunda wakati akizungumza kwenye Mahafali ya 44 yaliyofanyika mjini Morogoro  kwenye Kampasi ya Edward Moringe  Oktoba 17, 2024, ambapo wanafunzi  3061 wamehitimu masomo yao katika ngazi za Shahada, Stashahada na Astashahada.

Akielezea majukumu yaliyotekelezwa na Chuo tangu Mahafali ya 43 yaliyofanyika tarehe 23 Mei, 2024, , Prof. Chibunda amesema SUA imeendelea kuboresha mitaala yake ili kuendelea kutoa mafunzo yanayolenga kumjengea mwanafunzi ujuzi, weledi na stadi za kujiajiri na kuajirika ikiwemo kuongeza fursa za kujenga ubunifu kwa wanafunzi na kukuza stadi za kazi zinazozingatia viwango vya kimataifa.

                             

“Jumla ya mitaala 99 (62 ya Shahada za Uzamili na 37 ya Shahada za Awali) ya Chuo Kikuu Cha Sokoine cha Kilimo imefanyiwa mapitio na uhakiki na Wizara ya Elimu, Sayansi na Teknolojia, aidha mitaala 81 imewasilishwa Tume ya Vyuo Vikuu kwa ajili ya kuidhinishwa”, amesema Prof. Chibunda.

Ameyataja mafanikio mengine kuwa ni Chuo  kupata miradi mipya ya utafiti 11 Katika kipindi cha mwezi Mei, 2024 hadi Oktoba 2024 yenye thamani ya takribani shilingi bilioni 4.5.

Akizungumza katika mahafali hayo Mwenyekiti wa Baraza la Chuo hicho Mhe. Jaji Mohamed Chande Othman amewakumbusha wahitimu hao  kuwa maisha ya kitaaluma, na mitazamo ya maisha kwa ujumla yanabadilika kila wakati kutokana na misukumo mbalimbali ya teknolojia na mazingira.

“Hivyo, niwaombe wahitimu wote kubadilika kulingana na mabadiliko ya teknolojia na mazingira na kutumia mabadiliko hayo kama fursa ili kujiletea maendeleo yenu wenyewe, familia zenu, jamii na taifa kwa ujumla na kuibua fursa za kujiajiri na kuwaajiri watu wengine” amesema Mhe. Chande.