Idadi ya wahitimu wanawake SUA yafikia asilimia 46

 

Na: Farida Mkongwe

Jumla ya wanafunzi 3061 wamehitimu masomo yao katika ngazi ya Shahada, Stashahada na Astashahada katika Chuo Kikuu cha Sokoine cha Kilimo (SUA) huku idadi ya wanawake ikiendelea kufanya vizuri kwa wanafunzi 1411 sawa na asilimia 46.1 ya wahitimu wote na wanaume ni 1650 sawa na asilimia 53.9.

                                    

Akitoa takwimu hizo Oktoba 17, 2024 katika Mahafali ya 44 ya Chuo hicho Makamu wa Mkuu wa Chuo Prof. Raphael Chibunda amesema wahitimu wa Shahada za Awali wapo 2,809 ambapo kati yao wanaume 1,509 na wanawake ni 1,300, Shahada za Umahiri wahitimu 62 ambapo wanaume ni 34 na wanawake 28, Stashahada ya Juu ya Elimu wahitimu 3 wanaume wakiwa 2 na mwanamke 1, na wahitimu wa Shahada ya Uzamivu 25 kati yao wanaume 15 na wanawake 10.

                                    

Prof. Chibunda amesema wapo wahitimu 120 wa Stashahada ambapo wanaume wapo 60 na wanawake 60 na wahitimu 42 wa Astashahada wanaume wakiwa 30 na wanawake 12 ambapo amewapongeza wahitimu hao na hasa wanawake kwa kufikia hatua hiyo .

                                

“Kwa hakika tunastahili kujipongeza kwa mafanikio tunayoendelea kuyapata kila mwaka ya kuongeza idadi ya nguvukazi yenye taaluma, ujuzi na weledi ambao ni chachu ya kuongeza maendeleo katika nchi yetu, aidha kwa kuzingatia kwamba kuhitimu SUA haijawahi kuwa lelemama, kwa hiyo kwa dhati kabisa ya moyo wangu ninayo furaha kuwapongeza wahitimu wote”, amesema Prof. Chibunda.

Kwa upande wake Mwenyekiti wa Baraza la Chuo Jaji Mkuu Mstaafu Mhe. Mohamed Chande Othman amesema Baraza hilo limeendelea kutekeleza majukumu yake kwa ufanisi ikiwa ni pamoja na kuboresha mafunzo kwa vitendo na kuongeza ujuzi wa wahitimu.

                            

“Baraza limeendelea kuhimiza Menejimenti ya Chuo katika kutilia mkazo zaidi mafunzo kwa vitendo, kuboresha Mashamba darasa, Karakana za Uhandisi, Maabara na Misitu ya Mafunzo ili kutoa fursa kwa wanafunzi na wadau wengine wa kilimo kujifunza kwa vitendo ili kuongeza maarifa, ujuzi na umahiri kwa lengo la kuboresha elimu, maarifa, ujuzi na kuwajengea wanafunzi umahiri wa stadi za maisha”, amesema Mhe. Chande.