Wanataaluma SUA watakiwa kuzingatia usawa na uwiano wa kijinsia

 

Na: Farida Mkongwe

Wanataaluma wa Chuo Kikuu cha Sokoine cha Kilimo (SUA) wamejengewa uwezo wa kutambua masuala ya usawa na uwiano wa kijinsia katika Taasisi za Elimu ya Juu ili kuwawezesha kufanya kazi zao kwa kuzingatia fursa sawa kwa makundi ya kijinsia yaliyopo chuoni hapo.

Hayo yamebainishwa na Profesa Msaidizi John Jeckoniah kutoka Idara ya Taaluma za Maendeleo na Mafunzo Mkakati Machi 19, 2024 wakati akizungumza na SUA Media katika mafunzo ya kuwajengea uwezo Wanataaluma wa SUA kuhusu mbinu za kuboresha ufundishaji kwa Wanataaluma hao.

Prof. Jeckoniah amesema Taasisi za Elimu ya Juu zimekuwa zikipata changamoto myingi zinazohusiana na kutokuwepo kwa usawa na uwiano wa kijinsia na kwamba mafunzo hayo  yatawajengea uwezo Wanataaluma kutambua kwa ufasaha suala la usawa wa kijinsia ikiwa ni pamoja na kutambua vitendo vya ukatili na unyanyasaji wa kijinsia ambavyo vimekuwa vikiwaathiri zaidi wanawake katika mazingira tofauti.

“Kwanza kabisa kumekuwa na uelewa mdogo kwa wanataaluma kuhusu masuala ya jinsia kwa upana wake, wakijengewa uwezo namna ya kutambua vitendo hivi vya unyanyasaji na ukatili wa kijinsia itasaidia sana maana vitendo hivi wakati mwingine vinatokana na mila, desturi na tamaduni ambazo tumekuwa nazo katika malezi na makuzi yetu”, amesema Prof. Jeckoniah.

Amesema kuna ubaguzi na unyanyasaji wa kijinsia ambao pia unajitokeza kwenye baadhi ya machapisho na vitabu vinavyotumika kufundishia lakini hauonekani kwa urahisi na kutolea mfano machapisho au vitabu vinavyotumia picha ya jinsia ya kiume kuonesha mtu ambaye ni mahiri katika kazi zake au mtaalamu wa jambo Fulani na hivyo kujenga dhana potofu kuwa labda wanawake hawawezi kufanya kazi zao kwa weledi kama wanaume.

“Hata inapoandaliwa mitaala sisi wataalamu wa jinsia tunapenda kushirikishwa ili tuweze kuangalia kama mapungufu katika ufundishaji au kama kuna upotofu kuhusu dhana zisizo sahihi ambazo zipo nyingi lakini mara nyingi kwa sababu watu wamelelewa katika misingi hiyo hawaoni makosa hayo kwa hiyo kuna dhana potofu na tusipopata namna ya kuzitatua zinaweza kuendelea”, amesema Prof. Jeckoniah.