Wahadhiri Waandamizi SUA waipongeza Menejimenti kwa kuwaandalia mafunzo yenye tija

 

Na: Farida Mkongwe

Baadhi ya Wahadhiri Waandamizi wa Chuo Kikuu cha Sokoine cha Kilimo (SUA) wanaopata mafunzo ya kujengewa uwezo wa namna ya kuboresha ufundishaji na usimamizi wa Shahada za Awali, Shahada za Uzamili na Uzamivu wameipongeza Menejimenti ya Chuo hicho pamoja na waandaaji wengine kwa kuandaa mafunzo hayo ambayo yatawaletea ufanisi katika utendaji wa kazi zao.

Wakizungumza na SUA Media Prof. Justin Kalisti Urassa kutoka Idara ya Sera, Mipango na Usimamizi, Dkt. Khalfan Hamidu kutoka Idara ya Misingi ya Utawala na Uongozi Elimu katika Shule Kuu ya Elimu, na Mkufunzi Msaidizi Faines Msigwa kutoka Idara ya Infomatikia na Teknolojia wamesema mafunzo hayo yamekuwa wakati muafaka kutokana na mabadiliko ya teknolojia yanayotokea duniani kote kwa sasa.

                        

“Kwa tunavyofahamu katika maisha kujifunza ni kitu endelevu na unapojifunza unapata kitu kipya kinachoenda kuboresha utendaji wako, ukizingatia SUA ni Chuo kinachopendwa na wanafunzi wengi hivyo mafunzo haya yatatuwezesha kwenda kuwajenga wanafunzi wetu waweze kuwa na ubora zaidi na hivyo wahitimu kuweza kukubalika ndani na nje ya nchi”, amesema Prof. Urassa.

“Kwa upande wangu nimeona manufaa makubwa kwa sababu kimsingi mafunzo haya yamejikita katika suala zima la ubora katika huduma ambazo tunazitoa kwa wanafunzi pamoja na huduma za kijamii kwa wanajumuiya wa SUA, na yatatusaidia kwa sababu wanatunoa vizuri kiakili, kiujuzi na kiufahamu, tunawapongeza kwa sababu wanatufundisha misingi ya kuzingatia kwenye masuala ya utoaji wa elimu fundishi, elimu ongozi lakini pia katika kufanya vitu kwa ufanisi na kuzingatia ubora”, amesema Dkt. Hamidu

                        

Kwa upande wake Mkufunzi Msaidizi Faines Msigwa amesema anaendelea kujifunza kutoka kwa wataalamu mbalimbali na wawezeshaji mahiri waliopo kwenye mafunzo hayo.

                        

“Mpaka sasa nimejua sheria ambazo mwananfunzi anatakiwa azifuate wakati wa mitihani na je mwananfunzi akikutana na kosa fulani ni nini kinatakiwa kifanyike kwa huyo mwananfunzi, natumai nitaendelea kujifunza na nikitoka hapa nitakuwa nimejua mambo mengi”, amesema Mkufunzi huyo Msaidizi.

KATIKA PICHA MJONGEO