SUA yasaini makubaliano na Taasisi 10 kutoka Wizara ya Mifugo na Uvuvi

Na Josephine Mallango 

Chuo Kikuu cha Sokoine cha Kilimo (SUA) kimesaini  makubaliano  ya ushirikiano na Taasisi 10 kutoka  Wizara ya Mifugo na Uvuvi  ambapo  Waziri wa Wizara hiyo  Mhe. Abdallah Hamis Ulega  amesema watatumia vijana  madaktari wa mifugo kutoka SUA katika kampeni  ya chanjo kwa mifugo nchi nzima na kuongeza kuwa huwezi kukamilisha kutaja mafanikio ya vijana bila  kutaja  SUA  katika mchango wake kwa vijana .

 Mhe. Abdallah Hamis Ulega (kulia) akimsikiliza Prof. Chibunda wakati alipotembelea maonesho ya Kumbukizi ya Sokoine (Picha zote na Mabula Musa)

Hayo  yamejili  Mei 23, 2023  wakati  wa ufunguzi wa Kumbukizi ya miaka 18 ya Hayati  Edward Moringe Sokoine mara baada ya Waziri  Ulenga  kutembelea maeneo mbalimbali ya chuo ikiwa ni pamoja Hospital  ya Taifa ya Rufaa ya Wanyama, Kituo cha Utafiti na Mafunzo ya Uchumi wa Bluu , Shamba la Malisho ya Mifugo ,mabanda ya  maonyesho  pamoja na kushuhudia utiaji saini  wa  ushirikiano  wa  SUA na Taasisi 10 ikiwemo Taasisi ya Bodi ya Nyama (TMD) na Bodi ya Maziwa.

’’Taifa la Tanzania limepiga hatua sana toka kupata uhuru kwa sasa kuna nguvu ya watu ya kutosha na ukienda vyuoni kuna mtaji wa wasomi  ambapo kwa sasa kutokana na  Uongozi wa Rais  Mama Samia kuwa uongozi unaohitaji matokeo zaidi hiyo inatoa fursa kwa wataalam wetu  kutekeleza malengo ya kimaendeleo kwa vitendo  ili kazi iliyobaki ya uwekezaji  wa maarifa  yaweze kutafsiriwa na kwenda kukimbizana na hali ya uchumi wa sasa wa dunia.’’ Amemesema Mhe. Ulega.

Mhe. Abdallah Hamis Ulega akiangalia aina ya malisho ya wanyama yanayofanyiwa utafiti SUA

Waziri huyo ameongeza kuwa Wizara inayodhamira ya kufanya kampeni ya kuchanja mifugo nchi nzima kuwa ya lazima  ikiwa ni mkakati wa kuwashirikisha vijana wanaosoma SUA  Udaktari wa Mifugo  kuanzia mwaka wa tatu wa nne na wa tano wakishirikiana na wataalam wa maeneo husika na vijana  wasio na ajira waliopo mitaani  ambapo zoezi hilo la chanjo safari hii litaratibiwa na Wizara na kupangiwa kalenda  ili kulete matokeo chanya kwa kuondosha baadhi ya magonjwa  katika mifugo.

Amesema faida ya kuchanja wanyama ni kuongeza soko la nyama na kufungua  milango ya uuzwaji  wa mifungo kwa uwepo wa soko  la uhakika litakalopelekea wafugaji  kuvuna na kuchinja nyama nyingi kwa kuvutiwa na  bei nzuri  na kutoka kuuza nyama tani elfu 12 pekee kwa sasa  kwenda tani elfu 50 hadi tani  laki moja.

 ‘’Nanaamini wataalam hao wakifanya zoezi hilo la chanjo kwa vitendo kwa  pamoja nchi zima mpaka vijijini  dunia itaona  Tanzania imeamua kupambana na magonjwa  jambo ambalo litapelekea kuondoa  baadhi ya dhana  kutoka kwa nchi zinazoogopa  nyama ya Tanzania  kwa madai ya kuwa na magonjwa kwa kuwa sasa chanjo itakuwa inaratibiwa  siyo ya kusuasua ’’

Kwa upande wake Makamu Mkuu wa Chuo Prof. Rafael Chibunda amesema, pamoja na mafanikio mengi  ambayo chuo kimepata tangu kuanzishwa kwake mwaka 1984 lakini Chuo kilikuwa kinakabiliwa na  changamoto ya miundombinu ya kufundishia  na kujifunzia  na kwamba  wanatoa shukurani kwa Rais Samia Hassan Suluhu  kwa kuendelea kutatua changamoto hizo na kwa mara ya kwanza katika historia ya Chuo SUA kupitia Mradi wa Elimu ya Juu wa Mageuzi  ya Kiuchumi  (HEET) wamepata bilioni  73.6    fedha hizo tayari zimeanza kugharamia mafunzo, kuboresha  miundombinu  ya kufundishia na ununuaji wa vifaa  mbalimbali chuoni hapo.

Akizungumza kwa upande wa Taaluma amesema SUA imekuwa na mafanikio ikiwa ni pamoja  na  kutajwa na mashirika ya kimataifa kushika nafasi ya  pili nchini na nafasi ya 39 kwa ubora  Afrika,  ambapo amesema  kwenye kufundisha  SUA  hakuna maigizo na kwamba mwanafunzi  akichagua kusoma SUA amechagua chaguo bora kabisa na atasoma kwa vitendo  na kuwa na uhakika wa kukubalika katika soko la ajira na hata kujiajiri.

Prof. Chibunda amemuakikishia Mhe. Ulega kufanya kazi na taasisi walizosaini makubaliano kwa vitendo  katika kuongeza wigo wa fursa za  ajira kwa vijana kupitia kilimo , mifugo na uvuvi  na kwa kuongeza  pato la mtu mmoja mmoja na pato la taifa kwa kupitia sekta hiyo kwa kushirikiana kwa pamoja .

Mhe. Abdallah Hamis Ulega kulia akimsikiliza Mganga Mfawidhi wa Hospitali za SUA Dkt. Kasui 

Maonyesho hayo ya kumbukizi ya sokoine yameanza tarehe 23 Mei, 2023 ambapo yanaambatana na maonyesho ya teknolojia ya kilimo na ubunifu  ambayo yanafanyika katika viwanja vya SUA, aidha kuna Kongamano la Kisayansi , Huduma za Hospital ya Rufaa ya Wanyama na Huduma za Hospital za Binadamu ambazo zote ni bure, kauli mbiu kwa mwaka huu ni ‘Mazingira Wezeshi ya Ushiriki wa Vijana katika Sekta ya Kilimo, Sera, Miongozo na Utendaji’.

Picha chini Mhe. Ulege akitembelea mabanda mbalimbali kwenye maonesho ya SUA