Norway kuendeleza ushirikiano na Tanzania kupitia SUA

Na: Winfrida Nicolaus

Serikali ya Norway imeahidi kuendeleza ushirikiano na Tanzania kupitia Chuo Kikuu cha Sokoine cha Kilimo (SUA) katika maeneo mbalimbali ikiwemo Kilimo lakini pia Tafiti kuhusiana na Mabadiliko ya Tabianchi.

Makamu wa Mkuu wa Chuo Kikuu cha Sokoine cha Kilimo SUA Prof. Raphael Chibunda akimkaribisha Balozi wa Norway nchini Tanzania Mhe. Elizabeth Jocobsen (Picha zote na Gerald Lwomile)

Hayo yamebainishwa May 18, 2023 Mkoani Morogoro na Balozi wa Norway nchini Tanzania Mhe. Elizabeth Jocobsen alipofanya ziara yake SUA ambapo amesema chuo hicho kimekuwa Chuo Kikuu chenye umuhimu mkubwa kwa Tanzania na sehemu zingine kutokana na mafunzo wanayotoa ambayo si ya kinadharia pekee lakini pia kwa vitendo ambayo yanawasaidia wanafunzi wao pindi wanapoenda kwenye soko la ajira ama kujiajiri.

Amesema Norway na SUA wamekuwa na ushirikiano uzuri kwa zaidi ya miaka 5o sasa kwa kuwa ni Taasisi muhimu kwa ajili ya mafunzo ya Sayansi ikiwemo Ufugaji wa Samaki hivyo kuna sehemu nyingi ambazo wanaweza kushirikiana na kwa wakati huu si kilimo pekee ambacho watajikita nacho zaidi lakini pia wanaenda kufanya tafiti kuhusiana na Hali ya Hewa lengo likiwa ni kukabiliana na Mabadiliko ya Tabianchi.

Balozi wa Norway nchini Tanzania Mhe. Elizabeth Jocobsen (wa pili kulia) akisikiliza maelezo ya mmoja wa vijana waatamiwa katika kituo kilicho chini ya PASS kwa kushirikiana na SUA

“Nimevutiwa na shughuli mbalimbali nilizoziona hapa hivyo najisikia fahari kwa uhusiano wetu ambao umeendelea kujengeka hasa kwa ajili ya Kituo cha Hewa Ukaa (Carbon Monitory Center) ambapo tunaenda kufanya mazungumzo ili kuona ni namna gani tunaweza kushirikiana na kuweza kuihusisha SUA na ajenda tuliyonayo kuhusiana na Mabadiliko ya Tabianchi”, amesema Balozi. Elizabeth

Kwa upande wake Makamu wa Mkuu wa Chuo Kikuu cha Sokoine cha Kilimo SUA Prof. Raphael Chibunda amesema ujio wa Balozi huyo ni sehemu ya utekelezaji wa agizo la Serikali ya Awamu ya Sita lakini zaidi kwa Mhe. Rais Dkt. Samia Suluhu Hassan la kuvitaka vyuo vikuu nchini kutokuwa vyuo vikuu vya watu wa ndani pekee bali vifanyiwe umataifishaji ‘international’ sio tu kupata wanafunzi kutoka nje ya nchi lakini pia walimu.

“SUA imekuwa mstari wa mbele kwenye utekelezaji wa maelekezo ya Serikali katika kufikia Balozi mbalimbali, kuwakaribisha vilevile kuwajengea uelewa ili kuja kuona kuwa Chuo Kikuu cha Sokoine cha Kilimo chenye historia kubwa kina mambo gani ambayo yanafanyika, jinsi gani kinatoa mafunzo kwa wanafunzi wake, tafiti gani zinafanyika na wakishajua hayo inakuwa rahisi hata kuwaomba mkawa na ushirikiano ambao utazaa matunda”, amesema Prof. Raphael Chibunda

Balozi wa Norway nchini Tanzania Mhe. Elizabeth Jocobsen akiwa ameshika tunda katika kituo Atamizi

Ameongeza kuwa Norway sawa na nchi nyingine duniani wanatilia mkazo kwenye mambo ya Mabadiliko ya Tabianchi hivyo waatafanya mazungumzo na kuona kama chuo chao kinaweza kuendelea kutoa utaalam, ushauri kwenye eneo hilo kwa manufaa ya nchi.

Maeneo aliyotembelea Balozi huyo wa Norway ndani ya SUA ni pamoja na Maabara ya Sayansi iliyoko Kampasi ya Solomon Mahlangu ambayo ilijengwa chini ya mradi ambao uligharamiwa na watu wa Norway, Kituo Atamizi kilichopo chini ya PASS ili kujionea upanuzi wa ajira kwa vijana kwenye Kilimo, Kituo cha Hewa Ukaa vilevile Uchumi wa Buluu sehemu ambayo inatumika kwa ajili ya tafiti lakini pia ufugaji wa Samaki na viumbe maji wengine.

Pichani chini Balozi wa Norway nchini Tanzania     Mhe. Elizabeth Jocobsen akijionea mambo mbalimbali wakati alipotembelea SUA