Watumishi MSD waipongeza SUA

 

Na: Farida Mkongwe

Watumishi kutoka Bohari Kuu ya Dawa nchini MSD ambao wanajiandaa kustaafu utumishi wa Umma wamekishukuru Chuo Kikuu cha Sokoine cha Kilimo SUA kwa kutoa Elimu ya Kilimo na Ufugaji ambayo imekuwa ikiwanufaisha wakulima wengi nchini.

Watumishi kutoka Bohari Kuu ya Dawa nchini MSD ambao wanajiandaa kustaafu utumishi wa Umma wakipata maelekezo kuhusiana na minyoo inayofanyiwa utafititi kwa ajili ya chakula cha samaki mara baada ya kuwasili Kitengo cha Samaki SUA kupata elimu hiyo.

Shukrani hizo zimetolewa na baadhi ya watumishi hao wa MSD wakati walipofanya ziara ya mafunzo chuoni hapo yenye lengo la kuwawezesha kupata elimu na kuzitambua fursa zilipo SUA ambazo zinaweza kuwaongoza katika Miradi mbalimbali watakayoianzisha katika kipindi hiki cha maandalizi ya kustaafu.

Wakizungumza na SUAMEDIA Februari 16, 2023 Bi. Mary Mshanga kutoka Kilimanjaro na Manyema Nicholaus Mpangala kutoka Iringa wamesema ziara hiyo imekuwa ni yenye mafanikio kwa sababu wamekutana na Wataalam wa SUA upande wa Shamba la Mafunzo na kujifunza kuhusu ufugaji wa Samaki, Ng’ombe wa Maziwa, Mbuzi na Kondoo lakini pia wamepata elimu kuhusu Kilimo cha Bustani ya Mboga mboga na Matunda pamoja na Miche viungo na Maua.

“Tunawapongeza SUA kwa kazi kubwa wanayofanya ya kuelimisha jamii kuhusu masuala ya kilimo, mimi nimejifunza ufugaji wa samaki nimeweza kujionea hatua kwa hatua namna vifaranga vya samaki vinavyozalishwa, pia nimejifunza kuhusu ng’ombe wa maziwa na mambo mengine mengi, kwa kweli tunamshukuru mwajiri wetu kwa kutupatia fursa hii ya mafunzo”, amesema Bi. Mary.

Akitoa shukrani kwa SUA kwa niaba ya watumishi hao, Mhadhiri Msaidizi kutoka Chuo cha Utumishi wa Umma Tawi la Mbeya ambaye ni Mratibu wa ziara hiyo Bw. Livin Leon amesema wameamua kujifunza kutoka SUA kwa sababu SUA ni Chuo cha Serikali chenye wataalam wa fani zote katika masuala ya kilimo na ufugaji.

Awali akitoa mafunzo kwa watumishi hao Msimamizi wa Shamba la Mafunzo Kitengo cha Bustani na Mbogamboga Roman Mfinanga aliwaeleza watumishi hao kuwa ili waweze kulima kwa tija ni lazima wazingatie mambo matatu ambayo ni kuwa na chanzo cha maji ya kutosha, kujua aina ya udongo na kuzingatia hali ya hewa kwa sababu kuna mazao yanayostawi kwenye baridi na kwenye joto.

Hili ni kundi la pili la Watumishi hao wa MSD wenye umri wa kuanzia miaka 55 ambao wanajiandaa kustaafu kufika SUA kwa ajili ya kujifunza namna ya kuendesha Miradi mbalimbali iliyofanikiwa kupitia SUA, ambapo kundi la kwanza lilikuwa na watumishi 28 huku kundi hili la pili likiwa na watumishi 30.   

Watumishi kutoka Bohari Kuu ya Dawa nchini MSD ambao wanajiandaa kustaafu utumishi wa Umma wakiwa katika moja ya Shamba Darasa Kitengo cha Samaki kwa ajili ya kujifunza ufugaji wa samaki katika Bwala la kuchimba ardhini.

Msimamizi  Shamba Darasa Kitengo cha Bustani na Mbogamboga Bw. Roman Mfinanga akitoa maelekezo kwa Watumishi kutoka Bohari Kuu ya Dawa nchini MSD ambao wanajiandaa kustaafu utumishi wa Umma kuhusiana na Kilimo cha Mbogamboga na Matunda.