Mkakati wa BBT ni msaada kwa vijana kujiajiri- Dkt. Mnubi

Na: Hadija Zahoro

Mkakati mpya 'Building a Better Tomorrow' (BBT) unaolenga kuongeza ushiriki wa vijana katika kilimo kwa kuwapatia mafunzo, maeneo ya mashamba, mitaji na kuwaunganisha na fursa za masoko  utawawezesha vijana kujiajiri na kupambana wenyewe.

    

Mhadhiri na Mtaalamu wa Kilimo , Ufugaji na Uvuvi  wa SUA, Dkt. Renalda Mnubi, wakizungumzia  mjadala wa kuangazia  kilimo cha Tanzania uliolenga kuwapatia fursa  vijana kupitia mkakati huo.

Hayo yameelezwa na Mhadhiri na Mtaalamu wa Kilimo, Ufugaji na Uvuvi  wa SUA, Dkt. Renalda Mnubi, wakati akizungumza Mubashara na Shirika la Utangazaji Tanzania ( TBC)  wakiwa Chuo Kikuu cha Sokoine cha Kilimo (SUA), wakizungumzia  mjadala wa kuangazia  kilimo cha Tanzania uliolenga kuwapatia fursa  vijana kupitia mkakati huo. 

Dkt. Mnubi amesema kuwa kila mwaka kuna wanafunzi zaidi ya 200 wanahitimu katika kozi mbalimbali ikiwemo za kilimo  kitu  ambacho kinaupa ugumu serikali kuajiri wahitimu wote.

Kwa upande wake Mtaalamu wa  Kilimo Uchumi, Dkt. Zena Mpenda amesema kuna  60%  hadi 70% ya  vijana wanaohitmu  wanaongezeka  kila siku kwenye nguvu kazi inayohitajika, wameonekana kuishi chini ya mstari wa  umasikini  ambapo kunapelekea kutengeneza vibaka na wezi hivyo mkakati huo  umekuja kuwa suluhu ya kuondoa umasikini kwa sababu utaajiri watu wengi nchini wakiwemo vijana.

Naye Mtaalamu wa Kilimo Biashara ambaye pia ni Mhadhiri Mwandamizi SUA Dkt. Furgency  Mishiri, ameeleza kuwa mkakati huo ni mzuri kwa serikali na vijana kwa sababu ya fursa zinazoenda kupatikana  kutokana na utekelezaji wa mkakati huo.

‘‘Katika sekta ya kilimo  mara nyingi tunaangalia mnyororo wa thamani  ya mazao kutoka shambani mpaka mazao yanapomfikia mlaji hivyo, ukiangalia kuna sehemu nyingi katika mnyororo huo  ambapo vijana wanaweza kuingia ikiwemo fursa nyingi   za ajira  kwa ajili ya kupata kipato’’, anasema Dkt. Mishiri.

“Ilizoeleka kuwa mkulima lazima avae nguo chakavu lakini sasa hivi nyakati zimebadilika  ambapo wapo vijana ambao nawafahamu  wanahamasika  ambapo wamemaliza Shahada zao na wanafanya kilimo  pamoja na biashara kama vile kuchoma mahindi jambo ambalo linampa faraja, anaeleza Dkt. Mishiri.

Naye, Mhitimu wa SUA  na aliyekuwa Rais wa Serikali ya Wanafunzi 2021/2022, Mwita Mroni amesema kuwa hawawezi kusema kuwa wanategemea ajira kwa sababu kusomea kilimo  ni ajira tosha  hivyo wanatumia  taaluma hiyo kuhakikisha kuwa wanajiajiri wenyewe kwa kushirikiana na vijana wenzao.

Ameeleza kuwa Serikali kupitia BBT ni mkakati mzuri ambao utekelezaji wake utakwenda  kuleta matunda mazuri katika taifa la Tanzania hivyo, maono ya mkakati huo yakienda kutekelezwa ipasavyo  yatazalisha kilimo endelevu na stahimilivu.