SUA yawahakikishia mazingira rafiki wanataaluma wake

 

Na Ayoub Mwigune

Imeelezwa kuwa Chuo Kikuu cha Sokoine cha Kilimo (SUA) kimejidhatiti kuwatengezea wanataaluma wapya mazingira mazuri na rafiki ya kazi ili kutimiza majukumu yao kikamilifu wawapo chuoni.

Naibu Makamu Mkuu wa Chuo Taaluma, Utafiti na Ushauri wa Kitaalam Prof. Maulid Mwatawala akitoa hotuba ya ufunguzi

Hayo yameelezwa na Naibu Makamu Mkuu wa Chuo Taaluma, Utafiti na Ushauri wa Kitaalam Prof. Maulid Mwatawala wakati akimuwakilisha Makamu Mkuu wa Chuo hicho Prof. Raphael Chibunda , kwenye ufunguzi wa mafunzo ya siku tano ya kuwajengea uwezo wanataaluma wapya kwa ngazi ya wakufunzi wasaidizi na wasaidizi wa wanataaluma ili waweze kuwa na mbinu na uwezo wa kutenda kazi kwa ufanisi.

Awali Prof. Mwatawala amesema kuwa lengo la mafunzo hayo ni kuongeza ujuzi katika usimamizi wa masomo pamoja na kuwasaidia wanataaluma hao kuwa na uwezo wa juu wa kusimamia kazi za wanafunzi katika majukumu yao ya kitaaluma.

 

Wakufunzi wasaidizi na wasaidizi wa wanataaluma wakifuatilia hotuba ya ufunguzi wa mafunzo hayo

Aidha amesema Chuo hicho kitaendelea kujenga mazingira wezeshi kwa wanataaluma hao ili kuhakikisha wanatimiza majukumu yao ya kazi kwa urahisi wawapo chuoni hapo.

Prof. Mwatawala amesema ofisi ya Makamu Mkuu wa Chuo kupitia Kitengo cha Udhibiti Ubora kitaendelea kuandaa warsha kama hizo zenye dhana mbalimbali ili kuhakikisha uwezo wa wanataaluma unaongezeka katika kushughulikia changamoto mbalimbali zinazojitokeza.

Kwa upande wake Mkurugenzi Kitengo cha udhibiti Ubora Chuoni hapo Prof. Gration Rwegasira ameshukuru Mradi wa HEET kwa kuwezesha kwa asilimia kubwa mafunzo hayo ambapo zaidi ya wafanyakazi 80 wanatarajiwa kunufaika na mafunzo hayo .

Washiriki katika mafunzo hayo Bw. Mbonea Mwita na Rejoice Otaru wamesema mafunzo hayo yatawasaidia namna ya kushi wakiwa kazini kama wanataaluma, kutambua haki zao pamoja na namna ya kuweza kuwasiliana vizuri na wanafunzi wenye mahitaji maalum.

 

Naibu Makamu Mkuu wa Chuo Taaluma, Utafiti na Ushauri wa Kitaalam Prof. Maulid Mwatawala (katikati waliokaa) akiwa katika picha ya pamoja na wakufunzi wasaidizi na wasaidizi wa wanataaluma (mbele waliokaa ni viongozi mbali kutoka SUA)

Aidha wameishukuru menejimenti ya Chuo kwa kuandaa mafunzo hayo ya  siku tano pamoja na mradi wa HEET kwa kuwezesha mafunzo hayo.