Wananchi ungeni mkono ukomeshaji wa vitendo vya uchomaji misitu - TFCG na MJUMITA

 

Na: Calvin Gwabara

Kamati ya Kudumu ya Bunge ya Ardhi, Maliasili na Utalii imewataka Wananchi kwenye vijiji vinavyotekeleza Mradi wa Usimamizi shirikishi wa Misitu ya Vijiji kuunga mkono kwa dhati jitihada za Mashirika ya TFCG na MJUMITA kwa kukomesha kabisa vitendo vya uchomaji misitu ya vijiji ili waweze kuendelea kunufaika na rasilimali hizo vizazi na vizazi.

Mwenyekiti wa Kamati ya kudumu ya Bunge ya Ardhi Maliasili na Utalii Mhe. Ally Makoa (MB) wakati akizungumza na Wananchi wa Kijiji cha Chabima Wilayani Kilosa Mkoani Morogoro.

Kauli hiyo imetolewa na Mwenyekiti wa Kamati hiyo Mhe. Ally Makoa  wakati akizungumza na wananchi wa kijiji cha Chabima wilayani Kilosa mkoani Morogoro wakati wa ziara ya kamati hiyo ilipotembelea kujionea na kujifunza namna Shirika la Kuhifadhi Misitu ya Asili Tanzania (TFCG) na Mtandao wa Jamii wa Usimamizi wa Misitu Tanzania (MJUMITA) wanavyotekeleza Mradi wa Usimamizi shirikishi wa Misitu ya Jamii (USMJ) chini ya Mradi wa Kuleta Mageuzi katika Matumizi ya Mkaa Tanzania (TTCS) inavyofanya kazi na kulinda misitu huku ikinufaisha jamii.

“Tumeona kazi kubwa ya kutoa elimu ya utunzaji na usimamizi wa misitu ya jamii iliyofanywa na wadau hawa lakini kiukweli bado kuna wimbi kubwa sana la uchomaji wa misitu katika wilaya ya Kilosa kwenye njia ambayo tumepita tukija kijijini kwenu, Miradi hii itakuwa na maana zaidi kama Wananchi mtashiriki kikamilifu katika kuzuia mioto hii tuliyoiona njia nzima maana inaharibu kabisa malengo ya Mradi na Serikali katika kutunza misitu hii muhimu kwa ustawi wa Taifa letu”, alisema Mhe. Makoa.

Akielezea mbinu hiyo inavyofanya kazi huku akijibu baadhi ya maswali ya Wabunge, Meneja wa Mradi huo Charles Leonard amesema mfumo huo unatekelezwa baada ya Tafiti nyingi zilizofanywa kwenye nchi mbalimbali na kuonekana kufanya vizuri nchini Zambia ambapo jamii zimeweza kutunza misitu baada ya kupata faida kwa mtu binafsi,Vijiji na Serikali na tofauti na maeneo mengine ambayo jamii inaona misitu ni mali ya Serikali tu.

Mkurugenzi msaidizi wa Shirika la kuhifadhi Misitu ya asili Tanzania (TFCG) bwana Charles Lyimo akieleza namna vijiji pia vinavyoweza kunufaika na uuzaji ya hea ya Kaboni.

Bw. Leonard amesema Mradi hauishii kwenye kutekeleza kwa maneno tu bali una programu nzuri ya ufuatiliaji wa uchipuaji wa miti hiyo kwenye vijiji vyote 41 ambayo inafanywa kwa kushirikiana na watafiti Kutoka Chuo Kikuu cha Sokoine cha Kilimo SUA kupitia Ndaki yake ya Misitu pamoja na Taasisi ya Utafiti wa Misitu Tanzania TAFORI ambao hutoa mapendekezo na ushauri wa namna bora ya utekelezaji na uboreshaji wa mfumo huo ingawa takwimu za mwaka jana zimeonesha kuwa mfumo huo umefanya vizuri kwa zaidi ya asilimia 88.

Kwa upande wake Mkurugenzi Msaidizi wa TFCG  Bw. Charles Lyimo amesema Vijiji hivyo havitaishia kunufaika na Mkaa, Mbao na Mazao mengine lakini pia vitaweza kupata faida kwenye uuzaji wa Hewa ya Kaboni kwa kuwa miti mipya inayochipua itakuwa na uwezo zaidi wa kuvuta hewa hiyo kuliko miti ya miaka mingi iliyozeeka.

Wakieleza namna walivyonufaika na Mradi huo Afisa Mtendaji wa Kijiji kwa niaba ya Wananchi wa kijiji cha Chabima Bi. Marrygoleth Mlengeni amesema Mradi ulianza mwaka 2017 lakini awali mwaka 2011 mradi wa MKUHUMI uliwezesha  kutengeneza mpango wa matumizi bora ya ardhi katika Kijiji chao kwa kupanga maeneo ya makazi,kilimo, misitu na ufugaji na hivyo kusaidia katika usimamizi wa ardhi.

Shirika la Kuhifadhi Misitu ya Asili Tanzania (TFCG) na Mtandao wa Jamii wa Usimamizi wa Misitu Tanzania (MJUMITA) kwa pamoja wanatekeleza Mradi wa Usimamizi shirikishi wa Misitu ya Jamii (USMJ) chini ya Mradi wa kuleta Mageuzi katika ya Mkaa Tanzania (TTCS) kwa ufadhili wa Shirika la Maendeleo la Uswiss (SDC).