Wanafunzi waliochaguliwa kujiunga SUA watakiwa kuwa na nidhamu na kutumia muda vizuri

 

Na Editha Mloli

Wanafunzi wa mwaka wa kwanza waliochaguliwa kujiunga na Chuo Kikuu cha Sokoine cha Kilimo (SUA), wameaswa kuwa na nidhamu, bidii, pamoja na kutojihusisha katika uhalifu wa aina yoyote utakaoweza kuharibu malengo yao  pindi wawapo chuoni hapo, na badala yake kujitambua na kuzingatia kile kilichowaleta chuoni ili kutimiza ndoto zao.

Makamu Mkuu wa Chuo SUA Prof. Raphael Chibunda, akiwapongeza na kuwakaribisha wanafunzi waliochaguliwa kujiunga na chuo. (Picha na Gojo Mohamed)

Hayo yamezungumzwa Makamu Mkuu wa Chuo cha SUA Prof. Raphael Chibunda,  katika ukumbi wa Freedom Square, Kampasi ya Solomon Mahlangu wakati akiwapongeza na kuwakaribisha wanafunzi waliochaguliwa kujiunga na chuo hicho pamoja na kutoa maelekezo ya kuzingatia pindi wawapo chuoni.  

Prof. Chibunda amewataka wanafunzi hao kuzingatia nidhamu na kuepuka makosa ya kimtandao yaani (Cyber Crimes), makosa ya uzalilishaji wa kijinsia ambao mara nyingi unawalenga wanawake, lakini pia amewataka kuwa mabalozi wazuri wa SUA, kuendana na teknolojia pamoja na kuwa na matumizi mazuri ya muda.

Ameongeza kuwa wanafunzi wanapokuwa chuoni wapo huru na hakuna anayewafuatilia hivyo kuwataka kuwa waangalifu sana na afya zao na kujiepusha na magonjwa hasa UKIMWI na kuutumia muda vizuri wanapokuwa chuoni ili kumaliza kwa wakati waliopangiwa na kufikia ndoto zao.

Kwa upande wake Mkurugenzi wa Shahada za Awali wa Chuo Kikuu cha Sokoine cha Kilimo Dkt. Nyambilila Amuri amewataka wanafunzi kukamilisha usajili kwa muda wa siku 14 waliopangiwa hadi Novemba 16, 2022, ili kuepuka usumbufu utakaojitokeza.

Dkt. Nyambilila pia amewataka wanafunzi kutokuiba kazi za watu wengine na kudai kuwa ni kazi zao, lakini pia kutokufanya udanganyifu katika kipindi cha mitihani kwani ukikamatwa unafanya udanganyifu unaweza kufukuzwa chuo hivyo kuwataka kuwa waangalifu juu ya hilo.

Mkurugenzi wa Kurugenzi za Shahada za Awali Dkt. Nyambilila Amuri akitoa maelekezo kwa Wanafunzi waliochaguliwa kujiunga na SUA katika siku ya Wanafunzi kutambua mazingira ya Chuo uliofanyika Kampasi ya Solmon Mahlangu mkoani Morogoro. (Picha na Gojo Mohamed).

 

                       

Wanafunzi waliochaguliwa kujiunga na SUA wakifuatilia kwa umakini maelekezo katika Siku ya Utambulisho wa Chuo uliofanyika katika Kampasi ya Solmon Mahlangu. (Picha na Gojo Mohamed)