Wakulima zaidi ya 50 wakutanishwa SUA ili kutambua aina bora za Mbegu za Mazao na kujifunza Mbinu bora za Kilimo

Na Amina Hezron

Katika kuhakikisha Wakulima wadogo wanaongeza uzalishaji na kuondokana na wimbi la umasikini, Chuo Kikuu cha Sokoine cha Kilimo (SUA) kupitia Mradi wa Fair Planet umewakutanisha Wakulima zaidi ya 50 wanavyojishughulisha na Kilimo cha Mbogamboga kutoka kwenye Wilaya za Mvomero na Morogoro mkoani Morogoro kwa ajili ya kutambua aina bora za mbegu za mazao hayo pamoja na kujifunza mbinu bora za kilimo hicho zinazofanyiwa utafiti.

 Mtafiti kutoka Idara ya Mimea Vipando na Kilimo cha Bustani (SUA)  Dkt. Yasinta Zogela akizungumza na wakulima kuhusiana Malengo ya siku ya Mkulima Shambani katika Shamba la Mafunzo la SUA.

Hayo yamebainishwa na Mtafiti kutoka Idara ya Mimea Vipando na Kilimo cha Bustani Dkt. Yasinta Zogela wakati akieleza malengo ya siku hiyo ya mkulima shambani iliyofanyika kwenye Shamba la Mafunzo la SUA ambamo majaribio hayo ya mbegu na teknolojia zake yanafanyika.

Amesema lengo ni kufanya tathmini ya mbegu mbalimbali za mazao ya bustani ambazo zinaweza kustahamili katika hali ya hewa ya uwanda wa juu yanayofanyika katika kata ya Mgeta na uwanda wa chini  yanayofanyika SUA na baadae zikishafanyiwa tathmini na wakulima zikaonekana zinawafaa basi ziweze kutumika katika mashamba ya wakulima hao.

“Tuna Mbegu tofauti tofauti za mazao ya Bustani kutoka katika kampuni mbalimbali za Mbegu Duniani ambazo tumepitia hatua zote za kupata mbegu hizo ili tuweze kufanyia majaribio hivyo Wakulima watafahamu aina ya mbegu ambayo inastahamili Wadudu na magonjwa ikiwemo ugonjwa wa mnyauko ambao unasumbua sana hasa katika mazao ya bustani katika maeneo mbalimbali nchini”, alisema Dkt.  Zogela.

Nae Mratibu wa Mradi huo Gal Nir kutoka Izrael amesema kuwa mradi huo umekuwa ukifanya majaribio hayo tangu mwaka 2019 ambapo wamekuwa wakichukua mbegu kutoka makampuni mbalimbali ya mbegu na kuzifanyia majaribio kuona uwezo wake kabla ya kuzipendekeza kwa wakulima kulingana na maeneo yao wanayolima lakini pia kuwapa nafasi kutembelea na kujifunza.

Kwa upande  wao baadhi ya wakulima wa mazao ya mbogamboga kutoka Kingolwira akiwemo Bw.  Mayala Mabelele amewaomba Watafiti kutoka SUA kuwasaidia namna bora ya kuweza kukabiliana na changamoto ya Utitili katika kilimo cha vitunguu na ugonjwa wa Kanitangaze kwenye nyanya ili waepukane na matumizi ya viuatilifu ambavyo havionyeshi mafanikio.

Nae Afisa Kilimo Halmashauri ya Wilaya ya Morogoro Zeno Assay amewataka wakulima hao waliopatiwa mafunzo kuhakikisha mafunzo waliyopata yanawafikia  na wengine waliokosa nafasi hiyo ili na wao waweze kufahamu mbegu hizo zilizo kwenye majaribio na teknolojia bora za uzalishaji wa mazao ya mboga mboga. .

Mradi huo wa Fair Planet unafanya kazi zake nchini Ethiopia pamoja na Tanzania Mkoani Morogoro ambapo tayari umefanikiwa kutoa mafunzo kwa wakulima wa Hembeti, Mgeta, Kingolwir, Kipela na Mlali lakini mradi unatarajia kuendesha mafunzo katika maeneo mengine ya mkoa wa Morogoro na Nyanda za Juu Kusini.

Mkulima kutoka Kingolwira  Manispaa ya Morgoro Bw. Mayala Mabelele akizungumza na SUAMEDIA jinsi alivyonufaika na Elimu iliyotolewa katika Siku ya Mkulima Shambani SUA.

Mtafiti kutoka Idara ya Mimea Vipando na Kilimo cha Bustani (SUA)  Dkt. Yasinta Zogela akifafanua jambo kuhusiana na Malengo ya Siku ya Mkulima Shambani pamoja na majaribio ya Mbegu na Teknolojia.

Wakulima kutoka Wilaya ya Morogoro na Mvomero wakinusa Kitunguu kuoanisha harufu za aina nyingine ya Kitunguu katika Siku ya Mkulima Shambani iliyofanywa kwenye Shamba Darasa lililopo Chuo Kikuu cha Sokoine cha Kilimo (SUA).

Wataalam wa Kilimo kutoka nchini Israel kupitia Mradi wa Fair Planet wakijibu maswali kutoka kwa wakulima walioshirki katika Shamba Darasa Chuo Kikuu cha Sokoine cha Kilimo SUA ikiwa ni Siku ya Mkulima Shambani.

Wakulima kutoka Wilaya ya Morogoro na Mvomero wakisikiliza mafunzo kuhusu Mbinu bora ya Kilimo cha Kitunguu maji katika Shamba Darasa Chuo Kikuu cha Sokoine cha Kilimo SUA ikiwa ni Siku ya Mkulima Shambani.

Katika picha ya pamoja wakulima kutoka Wilaya ya Morogoro na Mvomero na Wataalam wa Kilimo kutoka SUA pamoja na wawakilishi wa Mradi wa Fair Planet kutoka Israel walipokutana katika Siku ya Mkulima Shambani Chuo Kikuu cha Sokoine cha Kilimo SUA.