Unyweshaji wa maziwa kwa Ndama ufanywe katika hali ya usafi ili kuondoa uwezekano wa kupata magonjwa

 

Winfrida Nicolaus

Imeelezwa kuwa unyweshaji wa maziwa kwa ndama sharti ufanywe katika hali ya usafi ili kuondoa uwezekano wa ndama kuharisha au kupata magonjwa ikiwemo Nimonia vilevile muda wa kumlisha au kumnywesha ndama unatakiwa uwe sawa kila siku na joto la maziwa lisibadilike.

Picha Mtandao

Hayo yamesemwa na Msimamizi wa shamba la malisho katika shamba la mfano katika Chuo Kikuu cha Sokoine cha Kilimo (SUA) Bw. Jontus Karoli wakati akizungumza na SUAMEDIA

Bw. Karoli amesema baadhi magonjwa kwa ndama hutokea hasa wakati wa unyweshaji wa maziwa hivyo mfugaji anatakiwa kuhakikisha kuwa vifaa anavyotumia katika unyweshaji maziwa vinakuwa safi na salama ikiwemo mikono, kucha za wastani pamoja na kuwa nafya njema yaani kutokuwa na magonjwa hasa yale ya kuambukiza kama TB, magonjwa ya kuharisha na mafua kwa kuwa kuna magonjwa ambayo hutoka kwa binadamu kwenda kwa mifugo na kutoka kwa mifugo kwenda kwa binadamu.

Amesema usafi pekee kati zoezi la unyweshaji maziwa kwa ndama ndio unaolinda afya yake lakini pia mfugaji anatakiwa kuhakikisha anatunza muda na joto la maziwa kwakuwa maziwa yakipoteza joto lake yanaenda kusimama tumboni na kuleta shida katika umeng`enywaji wa chakula kwa ndama na baadae kumsababishia kuhara.

‘‘Kwa wale wanaotumia ndoo katika unyweshaji wa maziwa kwa ndama ndoo ya chuma ‘aluminium’ ni nzuli zaidi na si ya plastiki kwa kuwa ya plastiki inatabia ya kutunza uchafu, mafuta pamoja na halufu na unapomalizia tu kunywesha osha vifaa kwa maji ya kutosha ikiwezekana tumia maji ya moto’’ Amesema Jontusi Karoli

Bw. Karoli ameongeza kuwa tofauti na kuhara kuna baadhi ya magonjwa mengine ambayo ndama wanaweza kuyapata hasa wale ambao kwa mara ya kwanza wanaachiwa kwenda nje kula nyasi kama vile ugonjwa wa mtoto wa jicho ambao unaletwa na inzi ambao wanasambaza bacteria kutoka kwenye mifugo mingine lakini pia katika kula wanakutana na minyoo ambayo baadae huwaletea viribatumbo

Amemalizia kwa kuwataka wafugaji kuwa na desturi ya kusafisha mazingira ya mifugo yao mara kwa mara hasa banda la mifugo kwa ufugaji endelevu na wenye tija.