Mkuu wa Mkoa wa Lindi Zainabu Telack amekipongeza Chuo Kikuu cha Sokoine cha Kilimo SUA kwa kazi nzuri wanazofanya kwa kuandaa vijana na kuwapa elimu inayowawezesha kufanya ubunifu wa vitu mbalimbali pamoja na kilimo ili kuweza kujikwamua kiuchumi.
Pongezi hizo amezitoa wakati akitembelea Banda la SUA kwenye maonesho ya tano ya Mifuko na Program za kuwezesha Wananchi Kiuchumi yanayofanyika kwenye uwanja wa Jamhuri mkoani Morogoro.
“Kama ikitokea watu wanasema kilimo ni fursa na vijana wakakubali kuingia kwenye kilimo haya maneno tunayosikia hakuna ajira yangekuwa yamekwisha kabisa hivyo niwaombe SUA kuendelea na jitihada hizi kubwa za kutoa elimu bora kupitia wataalamu wake”, amesema Telack.
Mkuu huyo wa mkoa ametolea mfano wa zao la Korosho mkoani Lindi kwa kufafanua kwamba korosho kilo 5 zilizobanguliwa zinatoa kilo 1 ambayo huuzwa kwa sh. 20,000/= mpaka 25,000/= hivyo ukiwa na hekari 3 za korosho tayari wewe ni mwajiri kwa hiyo vijana waache kuangalia kilimo kama sio fursa na waanze kutumia taaluma zao kujikwamua kiuchumi.
Mkuu wa mkoa amekitaka Chuo Kikuu Cha Kilimo cha Sokoine kuendelea kutoa elimu kwa wanafunzi na wananchi ili kuwasaidia kupata ujuzi zaidi na kuweza kuwasaidia vijana kujikwamua kiuchumi kwa kufanya kilimo biashara.
Kwa upande wake Juditha Bernad kutoka Ushirika wa Wahitimu Wajasiriamali wa Chuo Kikuu cha Sokoine cha Kilimo (SUGECO) ulioanzishwa mwaka 2011, ambao unasaidia vijana kuweza kujiari na kuajiri wengine amesema SUGECO iligundua kwamba vijana wengi wanaosoma masomo ya kilimo wanapomaliza hupata changamoto ya ajira, hivyo ushirika huu unanufaisha vijana kuweza kutumia taaluma zao kwa kujiajiri wenyewe.
Ameeleza namna wanavyonufaika kwa kufanyia kazi yale waliojifunza kwa kutengeneza vitu vyenye ubora kupitia mazao mbalimbali yatokanayo na kilimo na hivyo kujikwamua kiuchumi.
Ameanisha kuwa SEGECO kama ushirika unasaidia vijana hususani wale wanaosoma masomo ya kilimo kuweza kujiamini na kubadili mitizamo yao kwa kuchukulia masomo ya kilimo kama taaluma nyingine kwa kuwafundisha vijana waweze kuona kilimo kama fursa zingine.
“Zipo program nyingi zinazofanyika kupitia wadau mbalimbali pamoja na Serikali kuweza kufundisha vijana kujihusisha na masuala ya kilimo biashara” alisema Juditha.
Naye Mwakilishi kutoka Idara ya Lishe ya Binadamu na Sayansi ya mlaji Athumani Sadala ameeleza namna ambavyo wanatumia mabaki ya vitu visivyotumika kutengenezea bidhaa tofauti kama vile mapipa yasiyotumika kwa kuyakata na kutengenezea makochi, matairi mabovu ya baiskeli, bajaji na pikipiki kutengeneza urembo.
0 Comments