Wanafunzi lindeni utamaduni wa mtanzania-Prof. Yasinta Muzanila

Na: Gerald Lwomile

Katavi

Wanafunzi wa vyuo vya elimu ya juu nchini wakiwemo wale wa Chuo Kikuu cha Sokoine cha Kilimo (SUA) wametakiwa kuzingatia maadili na hasa katika mavazi ili kulinda utamadumi wa Mtanzania

Prof. Yasinta Muzanila akishiriki katika kiapo cha uadilifu

Akizungumza na wanafunzi wa SUA Kampasi ya Mizengo Pinda mkoani Katavi, Katibu wa Kamati ya Kuthibiti Uadilifu SUA (KKU) Prof. Yasinta Muzanila amesema pamoja na kuwa vijana wengi wanapenda kuwa kisasa lakini wanaweza kuwa katika hali hiyo huku wakilinda utamadani wa Mtanzania

“Ni kweli unaweza kuvaa suruali yako nzuri ya dangrisi au kadeti na ukaivaa vizuri tu bila kuishusha kwenye sehemu ya makalio, lakini pia kwa kina dada unaweza kuvaa blauzi yako nzuri ya kisasa kabisa pasipo kuacha kifua chako wazi” amesema Prof. Muzanila

Naye mjumbe wa kamati hiyo Bi. Lightness Mabula amewataka wanafunzi kuhakikisha wanajiepusha na ngono wawapo chuoni kwani jambo hilo linaweza kuwasababisha wakashindwa kufikia malengo yao

Amesema mbali na kushindwa kufikia malengo lakini pia wanaweza kupata magonjwa ya zinaa kama Ukimwi, Kaswenda, Ngono na hata kupata mimba au Watoto katika kipindi kisichotarajiwa

Awali Mwenyekiti wa KKU SUA Prof. Christopher Mahonge amewakumbusha wanafunzi kujua namna bora ya kupanga muda wao ili kuhakikisha wanafanya kile kilichowapelekea chuoni 

Amesema watu wengi wameshindwa kufanya na kutimiza malengo yao kutokana na kushindwa kupanga muda wao na kupelekea kushindwa kutimiza malengo yao.