SUA yapongezwa kuandaa mafunzo ya mafunzo ya matumizi ya mifumo ya taarifa za Kijographia

 

Calvine Gwabara.

Morogoro

Chuo Kikuu cha Sokoine cha Kilimo (SUA) kupitia kitengo cha SUA Innovation Hub, kwa kushirikiana na kampuni ya AQUILA EYES GROUP (AEG) ya Morogoro nchini Tanzania kwa udhamini wa “The Belt and Road Geospatial Information Training Center (BRGTC)” wamefanikiwa kuendesha mafunzo ya siku tatu ya kimataifa ya matumizi ya mifumo ya taarifa za Kijographia  (GEOSPATIAL INFORMATION SCIENCE) katika kutambua na kutatua changamoto mbalimbali za upatikanaji wa taarifa na matumizi yake katika sekta mbalimbali nchini.

Pichani ni washiriki wa mafunzo ya siku tatu ya kimataifa ya matumizi ya mifumo ya taarifa za Kijographia

Akifungua mafunzo hayo Kaimu Mkurugenzi wa shahada za juu, utafiti uhaulishaji wa Teknolojia na ushauri wa kitaalamu Dkt.Aquilina Mwanry amepongeza jitihada kubwa zilizofanywa na wadau hao na kufikia hatua ya kuendesha mafunzo hayo ya kwanza nchini, katika Chuo Kikuu cha Sokoine cha Kilimo (SUA), Morogoro na kuomba SUA iwe kitovu/kituo ambacho kitasaidia kutoa mafunzo haya kwa wadau mbalimbali katika matumizi ya teknolojia hiyo kwa kushirikiana na mdau mwenza (AQUILA EYES GROUP).

“Nimefurahishwa kusikia kuwa kituo kinakuwa na malengo mbalimbali ambayo ni pamoja na kutoa mafunzo kwa taaluma mbalimbali zinazohusu uchunguzi na maswala ya mifumo ya Sayansi ya kijografia (GIS) na ufafanuzi wa picha za anga (satellite images) kwa wanataaluma, taasisi na sekta binafsi kwa lengo la kuwaunganisha na kuhakikisha ushirikiano katika maswala ya Taarifa za Jongrafia (GIS) lakini pia kubwa zaidi ni kutambua wadau katika matumizi ya Teknolojia hii ikiwemo wanafunzi, taasisi binafasi na zile za kiserikali” Alisema Dkt. Mwanri.

Ameongeza kutokana na umuhimu wa Teknolojia hiyo ameomba waandaaji wa mafunzo hayo kuona sababu ya kuendesha mafunzo ya mara kwa mara nchini ili kuweza kuwafikia wadau wengi zaidi katika matumizi ya Teknolojia hiyo ili iweze kurahisisha kazi zao na kuchochea uchumi wa taifa hasa ikizingatiwa kuwa watu wengi hawaifahamu na hawatambui namna inavyoweza kurahisisha kazi zao za kila siku kwenye taasisi zao.

Dkt. Mwanri amesema anatambua ukuaji mkubwa katika Teknolojia za kijografia lakini bado nchini kuna changamoto kadhaa ambazo ni pamoja na utaalamu, mbinu na matumizi ya teknolojia kuwa machache, hivyo ni wakati sasa vijana walio kwenye fani hizo kuchangamka na kutafuta elimu zaidi na za kisasa kwenye maeneo hayo nchini.

“Mafunzo haya ya Teknolojia hii ya mfumo wa taarifa za kijiografia (GIS) na ufafanuzi wa picha za anga (Remote Sensing) nchini ni muhimu sana katika kuiunganisha Serikali na wadau lakini pia inagusa maswala ya Afya, majanga kama mafuriko, tetemeko la ardhi, moto, uharibifu wa misitu,  na mambo mengine mengi hivyo ni muhimu kuendesha mafunzo haya mara kwa mara ambayo yatawezesha kuongeza ufanisi katika kupata taarifa mbalimbali ambazo zipo kwenye mfumo huo kwa matumizi mbalimbali ya kimaendeleo” Aliongeza Dkt. Mwanri.

Kwa upande wake Dkt. Doreen Ndossi ambaye ni Mratibu wa uhaulishaji wa Teknolojia na ushauri wa kitaalamu kutoka SUA amesema ni fursa kubwa ambayo Chuo imeipata kupitia mkataba huo wa ushirikiano na wadau hao ambao umefanikisha mafunzo hayo ambayo yanakwenda kusaidia kujenga uelewa kwa wadau juu ya matumizi ya Teknolojia hiyo ya kisasa.

‘’Sisi kama Kurugenzi tunaona uwepo wa Teknolojia hiyo utasaidia sana katika kutoa taarifa mbalimbali muhimu za kazi tunazofanya Chuoni kwa wadau wetu mbalimbali na kufikia jamii kubwa zaidi na ndio msingi hasa wa mkataba wa makubaliano (MoU) tuliyosaini ili kufanya kazi nao kwa pamoja na kwa ukaribu kwa manufaa mapana ya Chuo na Taifa letu” Alibainisha Dkt. Ndosi.

Awali Mratibu wa mafunzo hayo nchini Dkt. Neema Sumari amesema kuwa wanafanya mafunzo hayo kwa kuwakutanisha pamoja wadau mbalimbali wa sekta binafsi na za kiserikali ili kuweza kuwafundisha namna ya kutumia mfumo huo wa kisasa ili waweze kwenda kuutumia na kurahisisha utekelezaji wa majukumu yao.

“Kwa kutumia mfumo huo utasaidia kupunguza gharama na muda katika kupata taarifa mbalimbali za kila sekta kulingana na mahitaji yao na kupitia mkataba wa makubaliano (MoU) kati ya SUA na iSpatial wanaweza kupata taarifa na elimu muhimu wanazohitaji kwa urahisi tofauti na sasa” Alibainisha Dkt. Sumari.

Dkt. Sumari amesema kwa mwaka huu ushirikiano huo umefanyika katika nchi mbili za Afrika ikiwemo Afrika ya kusini na Tanzania, na tayari mafunzo kwenye nchi hizo yamefanyika. Ambapo kila nchi imechagua mada kuu ya mafunzo, kwa kulingana na mahitaji ya taasisi mbali mbali kwa wakati huo.

 

Mafunzo hayo ya kwanza nchini ambayo ni ya siku tatu yanayowakutanisha wadau kutoka mashirika na taasisi za Serikali na zisizo za kiserikali  yamefadhiliwa na BRGTC na kuandaliwa  na SUA pamoja na kampuni ya AQUILA EYES GROUP kwa uratibu wa kitengo cha  SUA Innovation Hub.