Mkuu wa Wilaya ya Malinyi Mhe. Mathayo Maselle ameipongeza SUA kwa kuzalisha wahitimu ambao wanajiajiri na kusaidia kuanzisha miradi

 

Na Amina Hezron,Morogoro

Mkuu wa Wilaya ya Malinyi Mhe. Mathayo Maselle amekipongeza na kukishukuru Chuo Kikuu cha Sokoine cha Kilimo SUA kwa kuzalisha wahitimu ambao wanajiajiri na kusaidia kuanzisha miradi ambayo inachangia kutoa maarifa na kuzalisha ajira kwa vijana wengine nchini.

 Mkuu wa wilaya ya Malinyi Mathayo Maselle  akizungumza wakati wa uzinduzi wa mradi wa ufugaji wa nyuki wa kisasa kwa vijana wa Wilaya za Ulanga na Malinyi. ( Kushoto ni Kaimu Katibu Tawala Mkoa wa Morogoro Dkt. Rozalia Rwegasira)

Maselle amezungumza hayo wakati wa hafla ya uzinduzi wa Mradi wa Ufugaji wa Nyuki kwa Vijana wilaya ya Ulanga na Malinyi CHIBS unaoendeshwa na kampuni ya ACLA HONEY chini ya Program ya Kuwajengea Ujuzi vijana SET inayotekelezwa na  Shirika la Swisscontact kwa ufadhili wa Shirika la Maendeleo la Uswis SDC.

Mkuu huyo wa wilaya amesema kuwa kupitia fursa hiyo vijana wanakwenda kujiajiri na kutengeneza uchumi huku halmashauri ikienda kupata mapato.

“Vijana waitumie hii fursa ni fursa muhimu sana ambayo haichoshi kwa kuwa unaweza ukaifanya huku ukiwa unafanya shughuli yako nyingine, kama hawajawaambia vizuri kazi yako ni ndogo ukishakuwa na mzinga wako umejua mahali pa kuuweke kauweke pale kaendelee na shughuli zako za shamba ukisubiri kwenda kuvuna asali”, amesema Maselle.

Aidha amewataka  vijana waliopata fursa hiyo  na wananchi wote waliopata taarifa kuzitumia vizuri fursa zilizopo za misitu pamoja na kutunza maeneo ili kuweza kufaidika na fursa hiyo ya uvunaji wa nyuki.

Aidha Maselle ameongeza kuwa akiwa kama mmoja kati ya wahitimu wa SUA anaunga mkono juhudi hizo zilizoletwa na ACLA HONEY  huku akihakikisha matokeo ya kile ambacho kimekusudiwa yanaonekana .

Akielezea taarifa ya utekelezaji wa mradi huo muwakilishi wa Mkurugenzi wa Kampuni ya ACLA HONEY,  Giovanni Nguvu amesema kampuni hiyo ambayo imetokana na wahitimu wa Chuo Kikuu cha Sokoine cha Kilimo (SUA) kupitia taasisi ya SUGECO ina mashamba kwenye mikoa saba ya Tanzania yenye mizinga 7,000 na kampuni yao huzalisha asali tani zaidi ya 25,000 kwa mwaka na soko kubwa la asali yao ni nje ya nchi.

Alisema kutokana na uzoefu wa kampuni hiyo na uaminifu umekuwa ukitekeleza miradi mbalimbali nchini na sasa wamepata ufadhili wa kutekeleza mradi huu ambao utahusisha wilaya mbili za Malinyi na Ulanga na utawafikia vijana 1500 moja kwa moja wenye umri kati ya miaka 14 hadi 24 na kati yao 500 wakitoka wilaya ya Ulanga na 1,000 wakitoka Wilaya ya Malinyi.

“Mradi huu una malengo ya kukuza kipato cha kaya na kuongeza lishe kupitia ufugaji wa nyuki wa kisasa ambapo pamoja na wanufaika kuunganishwa kwenye vikundi na kupatiwa mafunzo lakini pia watapewa mizinga ya kisasa ya ufugaji wa nyuki, vifaa vya kulina asali na mazao mengine ya nyuki na kuhakikishiwa soko la mazao yote ya nyuki yatakayozalishwa”, alieleza Nguvu.

 Nguvu ameongeza kuwa maf unzo hayo pia yatakwenda mbali zaidi kwa kuwafundisha mbinu bora za kuongeza thamani mazao yatokanayo na nyuki kama vile kutengeneza Mishumaa, ving’arisha viatu, ving’arisha Midomo, Mvinyo pamoja na bidhaa zingine nyingi.

Amesema Mradi huo kwa sasa upo kwenye hatua za majaribio kwa kipindi cha miezi saba  kutoka mwezi wa nane  hadi wa tatu mwakani na pindi Mfadhili atakaporidhishwa na matokeo ya utekelezaji ya mradi basi awamu kuu ya miaka minne ya Mradi itaanza Mwezi Mei 2022 hadi mwezi Aprili 2026.

Mwakilishi wa Mkurugenzi wa Kampuni ya  ACLA HONEY,  Giovanni Nguvu akitoa taarifa ya utekelezaji wa Mradi  Ufugaji wa Nyuki kwa Vijana Wilaya ya Ulanga na Malinyi CHIBS unaoendeshwa na Kampuni ya  ACLA HONEY chini ya Program ya Kuwajengea Ujuzi vijana SET.

Viongozi mbalimbali wakifuatilia maelezo ya ufugaji bora wa nyuki na kujionea vifaa vya kisasa vya ufugaji vilivyotolewa kwa ajili ya mradi  wa Acla Honey.