SUA kuanzisha kozi mpya za Kilimo na Huduma za Kibenki na Stashahada ya Teknolojia na Uzalishaji wa Mbegu

Na Gerald Lwomile

Simiyu

Chuo Kikuu cha Sokoine cha Kilimo SUA kinatarajia kuanzisha kozi mpya za Kilimo na Huduma za Kibenki na kozi ya Stashahada ya Teknolojia na Uzalishaji wa Mbegu ili kuhakikisha inawasaidia wananchi na hasa katika kusimamia fedha zitokanazo na mikopo

Akizungumza katika maonesho ya kilimo ya Nanenane yanayofanyika kitaifa Nyakabindi, Bariadi mkoani Simiyu Naibu Makamu wa Mkuu wa Chuo Kikuu cha Sokoine cha Kilimo SUA, Taaaluma Prof. Maulid Mwatawala amesema kozi hiyo ina lengo la kuhakikisha nchi inakuwa na watalaamu ambao watawasaidia wakulima kujisimamia katika mikopo

Amesema kutokana na wananchi wengi kukosa uelewa juu ya matumizi ya fedha za mikopo hali hiyo inawezekana inasababisha taasisi za kifedha ikiwemo benki kushindwa kutoka mikopo mikubwa

“Kwa hiyo tuna uhakika kwamba hawa wataalamu watakuwa na uwezo mzuri wa kusimamia mikopo au uwekezaji mahususi kwenye kilimo ambao unaweza kukabiliana na changamoto mbalimbali kama moto, mafuriko au mabadiliko ya tabia nchi na changamoto zingine”, amesema Prof. Mwatawala

Amesema inawezekana pia benki nyingi hazina watalaamu wa aina hii na hii itakuwa fursa pia ya kuhakikisha wanakuwa na watalaamu waliobobea katika fani hiyo jambo litakalomsaidia mkulima wa Tanzania

Maonesho ya Nanenane yanaendelea mkoani Simiyu na Agosti 3, 2020 Waziri Mkuu wa Jamhuri wa Tanzania Mh. Kassim Majaliwa atakuwa mgeni rasmi katika maonesho hayo yanayofanyika kitaifa mkoani Simiyu