Serikali ya mkoa wa Morogoro yaipongeza SUA kwakuwa wabunifu katika masuala yanayohusu kilimo

Na: Farida Mkongwe

Serikali ya mkoa wa Morogoro imekipongeza Chuo Kikuu cha Sokoine cha Kilimo SUA kwakuwa wabunifu katika masuala yanayohusu kilimo hali inayosaidia kutatua changamoto za

wakulima nchini.

Pongezi hizo zimetolewa na Katibu Tawala mkoa wa Morogoro Mhandisi Emmanuel Kalobelowakati akizungumza kwenye sherehe za kumpongeza na kumtakia heri aliyekuwa Naibu Makamu Mkuu wa Chuo (Taaluma) Prof. Peter Gillah ilizofanyika katika ukumbi wa Multipurpose uliopo Kampasi Kuu ya SUA mjini Morogoro.

Mhandisi Kalobelo amesema “SUA hakuna mfano wenu, sisi kama serikali tunajivunia sana uwepo wa chuo hiki hapa mkoani Morogoro, mmekuwa mfano wa kuigwa mnatumia ubunifu wenu kutafuta changamoto zinazowakabili wakulima na kisha mnatafuta ufumbuzi, kwa hilo nawapongezeni”.

“Ubunifu wenu ni katika taaluma, sisi ambao tupo serikali ni wadau wenu wa bidhaa mnazozalisha ambazo ni wanafunzi, sijawahi kunung’unikia wanafunzi au wafanyakazi wanaotoka SUA, ni wazi kuwa vijana wenu mnawapika vizuri ili ni lazima mliendeleze”, alisisitiza Katibu Tawala huyo wa mkoa wa

Morogoro.

Amesema kuwa serikali inahitaji sana kutumia elimu na kutoa wito kwa SUA kuendelea kutoa elimu kwa vitendo ili elimu hiyo iweze kuwasaidia wananchi na hasa wakulima huku akihimiza mahusiano mazuri baina ya SUA na taasisi nyingine za serikali.

“ Tungetaka kuona na tunapenda kwa kweli yawepo mahusiano ambayo yatatatua changamoto zilizopo, inashangaza kuona halmashauri zinakuwa na changamoto ambazo nyie SUA mnayo majibu ya changamoto hizo”, alisema.