Wafanyakazi SUA wametakiwa kuwajibika kwa maslahi ya Chuo na Taifa

 

Na: Siwema Malibiche

Wafanyakazi wa Chuo Kikuu cha Sokoine cha Kilimo (SUA) wametakiwa kuwajibika ipasavyo katika utekelezaji wa majukumu yao hasa ya kiutendaji yatakayo saidia  kutoa huduma stahiki kwa jamii kwa maslahi ya Chuo na Taifa kwa ujumla.

Hayo yamesemwa na Mkurugenzi wa Menejimenti Rasilimali Watu na Utawala SUA Bw. Peter Mwakiluma wakati wa mafunzo ya Mfumo wa Ofisi Mtandao  yaliyofanyika Chuoni hapo ambapo amewataka washiriki  wote wa mafunzo hayo kuwajibika ipasavyo kwa kuzingatia uharaka ,wakati na usahihi wa kazi zao ili kuboresha huduma zinazotolewa  na SUA.

Amesema SUA  imeleta mafunzo hayo ili kurahishisha utekelezaji wa kazi  ambapo awali zilikuwa zinatumia muda mrefu mpaka kufanyika kwa maamuzi yake  huku akiamini  mifumo hiyo ya kimtandao  itasaidia kuepusha upotevu wa  faili kwa sababu itasaidia kutambua kuwa faili  liko kwa muhusika gani na itasimamia vizuri taratibu za uendeshaji za kawaida.

Naye Afisa TEHAMA kutoka Mamlaka ya Serikali Mtandao Bw. Thomas Malinga ambaye alikuwa mwezeshaji wa mafunzo hayo, amesema mafunzo ya Mfumo wa Ofisi Mtandao utasaidia kuleta uwazi wa kiutendaji na hata ikitokea mfanyakazi ameleta uzembe katika majukumu yake itakuwa rahisi kumgundua endapo tu mifumo hiyo itatumika na kusimamiwa ipasavyo.

Pia ameipongeza Menejimenti ya SUA kwa kuona umuhimu wa matumizi ya mfumo huo kwani yatasaidia kurahisha utunzaji wa faili na kuepusha upotevu wa karatasi muhimu na amewataka washiriki wote wa mafunzo kuyafanyia kazi yote waliyojifunza na amewataka kuendelea kufanya mazoezi mpaka pale mfumo huo utakapoanza rasmi kutumiaka chuoni hapo.

Kwa upande wao watunza kumbukumbu kutoka SUA  Bi. Salma Bwanaheri  na Bw. Abel Macha washiriki wa mafunzo hayo wameipongeza SUA kwa kuleta mafunzo ya Mfumo wa Ofisi Mtandao  ambao utarahisisha ufanyaji wa kazi ikiwemo upotevu wa barua na wameahidi kufanyia kazi kwa namna ambavyo wameleekezwa ili kurahisisha utendaji wa kazi zao.

Mafunzo hayo yanayoendelea kutolewa ndani ya Chuo Kikuu cha Sokoine cha Kilimo yanawahusisha wafanyakazi wa Masijala, Viongozi wa Menejimenti ya Chuo, Wakuu wa Idara na Makatibu Ofisi.