SUA kuboresha Mitaala

 

Na: Winfrida Nicolaus

Makamu wa Mkuu wa Chuo cha Sokoine cha Kilimo (SUA) Prof. Raphael Chibunda amewataka washiriki wa Mafunzo ya Kujenga Uwezo wa Kuandaa na Kuboresha Mitaala ya SUA kuyatumia mafunzo hayo kupata uelewa na kwenda kuandaa Mitaala itakayokidhi na kuzingatia mahitaji ya soko la ajira.

Makamu wa Mkuu wa Chuo cha Sokoine cha Kilimo (SUA) Prof. Raphael Chibunda akizungumza wakati wa ufunguzi wa mafunzo (Picha zote na Ayoub Mwigune)

Amebainisha hayo wakati wa ufunguzi wa mafunzo hayo kwa siku ya pili ambayo ni sehemu ya Mradi wa Elimu ya Juu kwa Mageuzi ya Kiuchumi (HEET) yaliyofanyika katika ukumbi wa Mabara Mtambuka Kampasi ya Edward Moringe mkoani Morogoro Aprili 25, 2023.

Prof. Chibunda amesema SUA pamoja na mambo mengine inahitaji kuboresha Mitaala yake ili kuendelea kutoa mafunzo yanayolenga kumjengea mwanafunzi ujuzi, weledi na stadi za kujiajiri na kuajirika.

Amesema ili kufikia lengo hilo SUA inahitaji mitaala inayojumuisha maarifa ya kisasa yanayolingana na mahitaji ya soko la ajira inayotilia mkazo umahiri, kukuza stadi za kazi na inayozingatia viwango vya kimataifa.

Kwa upande wake mmoja wa wawezeshaji wa mafunzo hayo Ofisa Mwandamizi wa Elimu ya Juu Wizara ya Elimu Sayansi na Teknolojia na Mratibu Msaidizi wa Mradi wa Elimu ya Juu kwa Mageuzi ya kiuchumi (HEET) ambaye ni Afisa Mwandamizi wa Elimu ya Juu Wizara ya Elimu Sayansi na Teknolojia na Mratibu Msaidizi wa Mradi wa Elimu ya Juu kwa Mageuzi ya kiuchumi (HEET) Dkt. Evaristo Mtitu  amesema kati ya mambo manne ambayo Mradi wa HEET unataka kutekeleza moja wapo ni uhuishaji na uandaaji wa Mitaala.

Afisa Mwandamizi wa Elimu ya Juu Wizara ya Elimu Sayansi na Teknolojia na Mratibu Msaidizi wa Mradi wa Elimu ya Juu kwa Mageuzi ya kiuchumi (HEET) Dkt. Evaristo Mtitu akisisitiza jambo katika mafunzo hayo 

Amesema wanataka kuanzisha Mitaala isiyopungua 300 na kuboresha iliyopo ili ikidhi mahitaji ya sasa na baadae ya Taifa na itakayowawezesha wanafunzi kupata Maarifa au Stadi za kuajirika hivyo mafunzo haya kimsingi yataenda kuwajenea uwezo wanataaluma wa SUA katika kuhakikisha kuwa Mitaala iyoboresha inakuwa na sifa ya kumuwezesha mwanafunzi kupata ujuzi stahiki.

"Mwanzoni Mitaala ilielekeza zaidi kwenye kukuza fikra za wanafunzi lakini sio kuwawezesha kupata stadi za kuwafanya kuwa wabunifu, watafutaji au watengeneza ajira na badala yake Mitaala iliwaandaa kutegemea ajira za serikali hivyo naamini kupitia mafunzo haya wanataaluma wa SUA wataenda kwenye idara zao na kuanza kuandaa Mitaala itakayokidhi vigezo", amesema Dkt. Mtitu

Picha chini ni washiriki wa warsha ya maboresho ya Mitaala SUA