Matumizi ya Teknolojia yanaweza kukomesha vitendo vya ukatili wa kijinsia - Fatma Mwasa

 

Na.Vedasto George - Gairo

Serikali mkoani Morogoro imeliomba Jeshi la Polisi na vyombo vingine vinavyo jishughulisha  na makosa ya ukatili wa kijinsia kutumia Teknolojia  katika kutatua kesi za makosa ya ukatili ili kuweza kukomesha vitendo hivyo viovu ambavyo vimeendelea kurudisha nyuma maendeleo na ukuaji wa uchumi kwa Wanawake.

Mkuu wa Wilaya ya Mvomero Judith Nguli akizungumza na wanawake katika maadhimisho ya siku ya wanawake wakati akimwakilisha Mkuu wa Mkoa wa Morogoro Fatma Mwasa (Picha na Vedasto George)

Hayo yameelezwa na Mkuu wa Wilaya  ya Mvomero Judith Nguli wakati akimwakilisha Mkuu wa Mkoa wa Morogoro Fatma Mwasa katika kilele cha Maadhimisho ya Siku ya Wanawake Duniani ambayo imefanyika kimkoa  katika Halmashauri ya  Wilaya ya Gairo.

Pia Mkuu huyo wa Wilaya amewataka Wanawake mkoani  humo kuendelea  kuwa wabunifu katika utekelezaji wa majukumu yao na kwenda na kasi ya mabadiliko ya Teknolojia ili kuweza kujiendeleza katika Sekta mbalimbali  ikiwemo kukuza pato la familia.

Aidha amesema kutokurejeshwa kwa mikopo ya asilimia kumi inayotolewa na Serikali kupitia Halmshauri kuwa ni changamoto inayokwamisha ukuaji wa uchumi kwa Wanawake na kusababisha wanawake walio wengi kuendelea kuwa tegemezi jambo ambalo limepitwa na wakati katika zama hizi ambazo mabadiliko ya tekinoloja yameendelea kuwa makubwa.

Awali akisoma risala kwa niaba ya Wanawake wa mkoa wa Morogogo, Afisa Maendeleo ya Jamii mkoa wa Morogoro Bi. Tumaini Wapalila amesema ili kufikia malengo yaTaifa ya kufikia katika uchumi imara katika viwanda ni lazima wanawake wawezeshwe kwa kupewa elimu ya uendeshaji wa viwanda .

 Afisa Maendeleo ya Jamii Mkoa wa Morogoro Tumaini Wapalila akisoma risala mbele ya mgeni rsimi katika maadhimisho ya Siku ya Wanawake Duniani

Akizungumzia changamoto zinazo wakabili wanawake kwa sasa Bi. Tumaini amezitaja kuwa ni upatikanaji wa masoko katika bidhaa zinazozalishwa na wajasiliamali ambapo ameiomba Serikali kuangalia uwezekano wa kuwasaidia masoko ya bidhaa ikiwemo urasimishaji wa bidhaa ili ziweze kushindana katika soko la kimataifa.

Naye Mkuu wa Wilaya ya Gairo Jabiri Omary Makame amesema Serikali kwa kutambua mchango mkubwa unaotolewa na wanawake katika kukuza uchumi kupitia halmashauri, imeendelea kutoa mikopo  ambayo inawawezesha wanawake kuweza kujiajiri. 

Kwa upande wake Mwenyekiti wa Halmashauri  ya Gairo Rael Nyangasi amewasistiza wazazi kushirikiana katika kutoa malezi bora kwa Watoto kwa sababu sasa hivi dunia inakabiliwa na changamoto kubwa ya matukio ya ukatili wa kijinsia.

Naye Mbunge wa Viti maalumu Jimbo la Morogoro Mh. Christina Ishengoma amesema Wanawake wanatakiwa kutumia fursa ya mabadiliko ya Teknolojia katika kupinga vitendo vya ukatili wa kijinsia ambavyo vinaendelea kushamiri katika maeneo mbalimbali ya nchi.

“Wanawake tutumie Teknolojia kupinga ukatili wa kijinsia tukifanya hivyo tunaweza kukomesha matendo haya maovu na tuwe wa kwanza  kutoa taarifa pale tunapo yaona matukio haya ya kinyama ambayo wanafanyiwa Watoto wetu lakini kwa akina mama na walemavu pia”,  amesema Mbunge huyo.

Aidha Mwenyekiti wa Kamati ya Wanawake kupitia Chama cha Wafanyakazi RAAWU Tawi la SUA Bi. Enessa Mlay ameishukuru Menejimenti ya Chuo Kikuu Cha Sokoine cha Kilimo SUA kwa kuwawezesha Wanawake wa Chuo hicho kuweza kushirikiana na wanawake wengine wa mkoa wa Morogoro katika Maadhimisho hayo.