SUA, wadau kupambana na changamoto ya kukosekana uzoefu kwa wahitimu

 

Na; Ayoub Mwigune

Katika kuhakikisha changamoto ya Wahitimu wa Elimu ya Juu kukosa uzoefu inapatiwa ufumbuzi, Chuo Kikuu cha Sokoine cha Kilimo (SUA) kupitia Mradi wa Elimu ya Juu kwa Mageuzi ya Kiuchumi (HEET) kimechukua hatua ya kuzikutanisha pamoja Sekta binafsi, Viwanda, Makampuni, na Taasisi zinazotoa mafunzo ya Kitaaluma ili kupanga mikakati ya pamoja ya kuondokana na tatizo hilo.

 

Mkurugenzi wa Kurugenzi ya Uzamili, Utafiti, Uhaulishaji wa Teknolojia na Ushauri wa Kitaalam Prof. Esron Karimuribo akizungumza na  wadau mbalimbali (hawapo pichani) katika kikao kilichofanyika Dar es Salaam

Hayo yameelezwa na Mkurugenzi wa Kurugenzi ya Uzamili, Utafiti, Uhaulishaji wa Teknolojia na Ushauri wa Kitaalam Prof. Esron Karimuribo  jijini Dar es Salaam Januari 17, 2023 wakati akizungumza katika kikao kilichowakutanisha pamoja wadau hao ili kuona namna bora ya kutatua changamoto ya ukosefu wa uzoefu kwa Wahitimu.

Awali Prof. Karimuribo alisema mara nyingi kumekuwa na lawama kati ya Taasisi za Elimu pamoja na Viwanda ambapo Taasisi za Elimu zenyewe zimekuwa zikiamini zinazalisha Wanafunzi bora wenye ujuzi wa kutosha lakini kwa upande wa Viwanda wenyewe wakiamini Wahitimu hao hawana mafunzo ya kutosha na uzoefu jambo ambalo limesababisha Wahitimu hao kushindwa kupata ajira katika maeneo mbalimbali. 

Aidha Prof. Karimuribo amesema kikao hicho ndio mwanzo wa kujadili mapungufu yaliyopo kati ya Viwanda, Makampuni na Taasisi za Elimu ya Juu na namna ya kuboresha mashirikiano ambayo yataweza kuwapa nafasi Wanafunzi wanapokuwa wanaendelea na masomo kuweza kupata nafasi ya kujifunza kwa vitendo ili kuongeza ujuzi wao utakao weza kuwasaidia kukabiliana na changamoto hiyo.

 

Mkurugenzi wa Kurugenzi ya Uzamili, Utafiti, Uhaulishaji wa Teknolojia na Ushauri wa Kitaalam Prof. Esron Karimuribo (waliokaa katikati) akiwa katika picha ya pamoja na washiriki wa kikao hicho

Prof. Karimuribo amesema Taasisi za Elimu ya Juu zina sehemu kubwa ya kuhakikisha zinawaruhusu watu kutoka katika Viwanda na Makampuni kushiriki kutoa mafunzo pale wanapokuwa wameandaa mafunzo yao kwani  mbali na kufanya tafiti na kutoa machapisho Vyuo vya Elimu ya Juu huko mbeleni vinategemea Wahitimu wake kuweza kumiliki makampuni  na Viwanda jambo litakalo wezesha kupata majibu sahihi na suluhisho katika tafiti zinazofanywa na Wanataaluma kutoka Vyuoni  .

 Naye Dkt. Felix Nandonde ambaye ni Mhadhiri wa Chuo cha SUA na Mratibu wa Mradi wa HEET katika eneo linalounganisha Viwanda na Taasisi za Elimu ya Juu amesema kupitia mradi huo wanatarajia Wanafunzi wa Tanzania wanaosoma Elimu ya Juu wanaondoa changamoto ya kukosekana kwa maarifa sahihi yanayosababishwa na ukosefu wa mafunzo ya vitendo kutokana na kuwaunganisha pamoja wadau kutoka kwenye Viwanda, Makampuni binafsi na Elimu ya Juu.

 Amesema kupitia Mradi huo Wanataaluma wanaweza kupata nafasi ya  kwenda kujifunza katika ulimwengu wa Viwanda ambapo wataweza kubadilishana mawazo ili kuinua ujuzi kati yao.

 Kwa upande wao Bw. Rajabu Athumani ambaye ni Afisa Programu kutoka  Chama Cha Wanawake Wafanyabiashara Tanzania (TWCC ) na Bi. Anna Malaba Mratibu msaidizi kutoka Chemba ya Wafanyabishara ,Viwanda na Kilimo Tanzania (TCCIA) wamesema mafunzo hayo yatawasaidia kubadilishana ujuzi na Wanataaluma pamoja na uzoefu pamoja na kufanya bunifu ambazo zitasaidia kukuza Viwanda.