Wananchi washauriwa kuwa na utaratibu wa uvunaji wa maji ya mvua yatakayowasaidia pindi yatakapohitajika

Na Amina Hezron, Morogoro

Katika kukabiliana na Mabadiliko ya tabianchi yanayosababisha

kukosekana kwa maji ya kutosha kwa ajili ya matumizi ya majumbani na

kuzalishia umeme nchini, imeshauriwa kuwepo kwa utaratibu wa uvunaji

wa maji ya mvua katika kipindi cha mvua za masika yatakayosaidia

pindi yatakapohitajika.

Mratibu wa Utafiti na Machapisho kutoka
katika Chuo Kikuu cha Sokoine cha Kilimo SUA, Prof Japhet Kashaigili akizungumza na wanahabari kutoka SUAMEDIA kuhusiana na namna ya
kukabiliana na changamoto ya upatikanaji wa maji.  

Ushauri huo umetolewa na Mratibu wa Utafiti na Machapisho kutoka

katika Chuo Kikuu cha Sokoine cha Kilimo SUA, Prof.  Japhet Kashaigili

wakati akizungumza na SUAMEDIA kuhusiana na namna ya

kukabiliana na changamoto ya upatikanaji wa maji.

Amesema tafiti zinaonesha kuwa maji yanapokuwepo katika kipindi cha

mvua kuna uwezekano wa kuhifadhiwa chini ya ardhi na kutumika pale

ambapo yatahitajika lakini wakati wa uhifadhi wake ni lazima

yahakikishwe yana ubora unaokubalika ili kuepusha kudhuru maji chini

ya ardhi kwa kuwa yakishadhurika hayawezi kutibiki kiurahisi.

“Uvunaji wa maji chini ya ardhi ni njia ya kipekee ya kukabilina na

majanga kama hayo ya upungufu wa maji lakini zoezi hili litafanywa vizuri

pale tu ambapo maji hayo yatafanyiwa tafiti, kufahamika yapo kiasi gani, yapo katika ubora gani na yanaweza kutumika kwa muda gani lakini pia

mipaka yake ikoje ili kuweza kuwekewa utaratibu mzuri wa matumizi

yake”, alisema Prof. Kashaigili.

Prof. Kashaigili amesema jambo hilo la uhifadhi wa maji chini ya

ardhi hufanyika nchini Afrika Kusini, Namibia lakini pia utafiti katika

bonde la maji ya chini ya ardhi la Makutupora mkoani Dodoma

umeonesha yawezekana kuvilia maji ya mvua kubwa chini ya ardhi kwa

kutumia utaalamu mbalimbali ambao unaweza kufanyika kwa kujenga

mabwawa madogo madogo ambayo yanaruhusu kuingiza maji taratibu

chini ya ardhi ama kwa kutumia visima.

Amesema utafiti uliofanyika unaonesha kuwa jambo hilo linawezekana

hivyo ni suala sasa la kuangalia namna ya kulitekeleza katika mikoa

mingine hata kwa kuchimba visima vya chini ya ardhi kikubwa ni

kujihakikishia kupitia tafiti.

“Wataalamu tuendelee kufanya tafiti zaidi ili kuweza kuishauri Serikali

namna bora ya kuweka maandalizi ya namna ya kukabiliana na matatizo

kama haya katika kipindi kingine”, alisema Prof. Kashaigili.

Aidha ameongeza kuwa ni wakati sasa wa kuwahamasisha na

kuwajengea uwezo wananchi juu ya uchimbaji wa visima ili waweze

kukabiliana na changamoto za upatikanaji wa maji na kutunza mazingira

ya mito.

“Tujitahidi kuwa na utaratibu mzuri wa kutunza vyanzo vya maji na

kupitia ofisi za Bonde Jumuiya ya watumia Maji na Serikali za Mitaa

kwenye maeneo yao kusimamia vyanzo vya maji ambapo kwa sasa

ukienda katika kipindi hiki cha kiangazi utakuta mifugo mingi inaingia

kwenye vyanzo hivyo na wanaathiri kwani mifugo inapokuwa mingi

sehemu moja inaathiri kingo za mto”, alisema Prof.  Kashaigili.