Wanafunzi wa Vyuo Vikuu wametakiwa kuzingatia Mafunzo kwa vitendo

 

Na: Mohamed Gojo

Wanafunzi wanaosoma Vyuo Vikuu wametakiwa kuzingatia mafunzo wanayofundishwa kwa vitendo kwa kuwa mafunzo hayo ndio yatakayo wanufaisha mara baada ya kumaliza masomo yao.

Wito huo umetolewa na Mhadhiri wa Idara ya Lishe ya Binadamu na Sayansi ya Mlaji katika Ndaki ya Kilimo iliyopo Chuo Kikuu cha Sokoine cha Kilimo SUA Mary Marcel wakati akizungumza na SUAMEDIA kuhusu umuhimu wa mafunzo kwa vitendo kwa wanafunzi.

Akizungumza kuhusu maonesho ya ubunifu yaliyofanywa na wanafunzi wa mwaka wa pili na wa tatu wanaosoma Shahada ya Sayansi ya Familia na Mlaji amesema mafunzo hayo kwa vitendo yatawasaidia wanafunzi hao kujiajiri hasa kwa wakati huu ambapo Tanzania inazungumzia uchumi wa viwanda

“Tunaelewa Tanzania sasa inaelekea kuwa Tanzania ya Viwanda na Rais wetu ameshaonesha kuwa tunataka kufufua viwanda kwa hiyo ujuzi watakaoupata sasa utawasaidia kuishi hali ya Taifa ya kuelekea kwenye viwanda….”, alisema Mhadhiri huyo.

Kwa upande wao baadhi ya Wanafunzi wanaosoma Shahada hiyo ya Sayansi ya Familia na Mlaji Juliana Maina na Fred James wamesema mafunzo hayo yanawasaidia kuwa wabunifu na kupata ujuzi ambao watautumia baada ya kuhitimu masomo yao.

Katika Maonesho hayo wanafunzi wameonesha ujuzi na ubunifu wao kwa kutengeneza viti kwa kutumia matairi ya magari, bajaji na pikipiki, maua kwa kutumia matawi ya miti yaliyodondoka pamoja na mapambo mbalimbali.