Serikali imeipongeza SUA kwa kuchukua hatua za kusaidia uwepo wa malisho nchini

 Na Gerald Lwomile

Morogoro

Serikali imekipongeza Chuo Kikuu cha Sokoine cha Kilimo (SUA) kwa kuanza kuchukua hatua za kusaidia uwepo wa malisho ya uhakika kwa wakulima

Waziri wa Mifugo na Uvuvi Mhe. Mashimba Mashauri Ndaki akizungumza na wadau wa malisho

Pongezi hizo zimetolewa April 21, 2021 mkoani Morogoro na Waziri wa Mifugo na Uvuvi Mhe. Mashimba Mashauri Ndaki wakati akifungua shughuli za Siku ya Malisho iliyoandaliwa na Chama cha Nyanda za Malisho Tanzania

Amesema SUA ambacho kupitia Mradi wa Innove Afrika umeanza kuchukua hatua ya uzalishaji malisho nchini hatua ambayo itasaidia sana kupunguza uhaba na migogoro kati ya watumiaji rasilimali ardhi na kuongeza  upatikanaji wa malisho bora  kwa wanyama.

Ameongeza kuwa ni vyema wafugaji kulinda rasilimali za nyanda za malisho na kuziboresha kwa kupanda malisho aina  mbalimbali.

Mhe. Ndaki ameahidi  kuwatembelea wazalishaji wa malisho aina ya Brachiaria  huko Rungwe mkoani Mbeya na kuwataka  wataalamu wa halmashauri  ya Rungwe walioambatana na wazalishaji  hao kuongeza idadi ya wazalishaji wa malisho hayo.

Wakati huo huo Serikali imekiri kuwepo kwa tatizo kubwa la malisho nchini na kusema kuwa kama hatua za dharura hazitachukuliwa nchi iko kwenye wakati mgumu wa kuhakikisha kunakuwa na ufugaji endelevu nchini

Hayo yamesemwa  April 21, 2021 mkoani Morogoro na Waziri wa Mifugo na Uvuvi Mhe. Mashimba Mashauri Ndaki wakati akifungua shughuli za Siku ya Malisho iliyoandaliwa na Chama cha Nyanda za Malisho Tanzania

Mhe. Ndaki amesema kuwa Tanzania ina namba kubwa ya mifugo ikiwa katika nafasi ya pili barani Afrika na kutokana na hali hiyo nchi hii ingekuwa imepiga hatua kubwa za kimaendeleo kwa mifugo iliyopo lakini kutokana na watu kushindwa kufuga kisasa na kibiashara mifugo imekuwa na pato dogo kwa mfugaji na Taifa kwa ujumla

Waziri huyo wa Mifugo na Uvuvi amesema pamoja na kuwepo kwa mifugo hiyo pia kumekuwa na tatizo la maeneo ya kulishia mifugo na wafugaji kushindwa kulinda maeneo ambayo yametengwa kwa ajili yao na kuepuka kuingia katika maeneo ambayo si yao ili kuepuka migogoro ya wakulima na wafugaji

“Kwa sababu mfugaji anahangaika kuangalia ni kwa namna gani atalisha huo mfugo wake, huyo anayefugwa naye anahangaika tu kwa sababu hana malisho ya kutosha kwa hiyo kila mmoja anakonda tu, kila mmoja anamuonea huruma mwenzake” amesema Mhe. Ndaki

Awali akimkaribisha Waziri wa Mifugo na Uvuvi ili afungue siku hiyo Mkuu wa Mkoa wa Morogoro Loata Ole Sanare amesema viongozi wengi katika maeneo mbalimbali wasio waaminifu wamekuwa hawana taratibu nzuri za utoaji wa ardhi jambo ambalo lilisababisha kuwepo kwa migogoro baina ya wakulima na wafugaji

“Na mapigano haya yanatokana na kutoheshimiana na uongozi mbovu wa viongozi wetu kule vijijini, kumekuwa na utaratibu wa kutoheshimu au kutopanga mipango bora ya matumizi katika vijiji vyetu, watu wanaingia katika maeneo mbalimbali ya mkoa wa Morogoro kwa fujo sana jambo linalosababisha vurugu baina ya wakulima na wafugaji”, amesema Sanare