Wizara ya Mifugo na Uvuvi imesema SUA kwa kushirikiana na Wizara hiyo ina fursa kubwa ya kuwajengea uwezo wafugaji

 

Gerald Lwomile

Tukuyu

Wizara ya Mifugo na Uvuvi imesema inaona kuna fursa kubwa ya kuwajengea uwezo wafugaji katika maeneo mbalimbali ili kujua uendelezaji wa malisho bora ambayo yatamuhakikishia mfugaji kuwa na afya bora lakini pia kuongeza kipato cha kaya

Mkurugenzi wa Utafiti, Mafunzo, na Ugani kutoka Wizara ya Mifugo na Uvuvi Dkt. Angelo Mwilawa wakati akizungumza na SUA Media

Hayo yamesemwa wilayani Rungwe mkoani Mbeya na Mkurugenzi wa Utafiti, Mafunzo, na Ugani kutoka Wizara ya Mifugo na Uvuvi Dkt. Angelo Mwilawa wakati akizungumza na SUA Media mara baada ya Warsha ya siku moja iliyoandaliwa na mradi wa Innove Afrika unaolenga katika kuhakikisha kunakuwa na uhakika wa chakula

Dkt. Mwilawa amesema kuwa hatua hiyo ya kuwaendeleza wakulima imekuwa ni  muendelezo wa maagizo kutoka kwa Waziri wa Mifugo na Uvuvi Mhe Mashimba Ndaki ambaye amekuwa akitaka kuhakikisha Wizara anayoongoza inatoa elimu ya kutosha kwa wakulima

Akizungumzia malisho ya nyasi aina ya Brachiaria ambazo zimefanyiwa utafiti na watafiti kutoka Mradi wa Innove Afrika ulio chini ya Chuo Kikuu cha Sokoine cha Kilimo (SUA) Dkt. Mwilawa amesema ni Mradi wenye mafanikio makubwa na kuwataka wafugaji katika wilaya hiyo na kote nchini kuhakikisha wanaendeleza teknolojia hiyo kwa kupanda na kustawisha nyasi hizo

“Na hili ambalo tumeliona, aina hii ya malisho ya Brachiaria ni moja ya aina ya nyasi za malisho ambazo zimefanyiwa utafiti nchini lakini kwa sasa tumeona aina hii ya malisho ina ubora mkubwa katika kuleta lishe bora kwa mifugo”, amesema Dkt. Mwilawa

Naye mmoja wa watafiti katika Mradi huyo Dkt. Ismail Suleiman amesema kuwa teknolojia hiyo imepokewa vizuri na wafugaji wengi wilayani Rungwe mkoani Mbeya kwani kwa sasa wafugaji wameamka na kuanza kupanda malisho hayo

Dkt. Ismail Suleiman akielezea nanma ya uoteshaji wa nyasi kwa ajili ya ulishaji wa mifugo

Amesema mradi ulianza na wafugaji wachache lakini kwa sasa idadi imekuwa ikiongezeka siku hadi siku kiasi kwamba wapo wafugaji waliamua kupanda malisho hayo wakati wa kiangazi na kumwagilia kwa maji ili kuhakikisha wanakuwa na malisho hayo

Mmoja wa wanufaika ambaye aliamua kupanda wakati wa kiangazi Bw. Anyabwile Asa Mwakosya amesema awali alikuwa akichukua nyasi porini na kwa kiasi kikubwa zilileta madhara kwa mifugo yake

“Awali nilikuwa nikikata majani porini na wakati mwingine ng’ombe alipokula mimba ilikuwa na uwezo wa kutoka na hata sikujua kwa nini, lakini kwa sasa tangu nianze kutumia nyasi hizo wanyama wangu mimba huenda kwa wakati muafaka pasipo kuvurugwa”, amesema Mwakosya

Mradi wa Innove Afrika unajumuisha nchi sita barani Afrika zikiwemo nchi za  Tanzania na  Kenya.