SUA yatakiwa kubuni vyanzo vyake vipya vya mapato

Na: Vedasto George 

Chuo Kikuu Cha Sokoine Cha Kilimo  SUA kimetakiwa kubuni vyanzo vyake vipya vya mapato ambavyo vitakiwezesha chuo hicho kuweza kujiendesha kikamilifu katika kazi zake za kiutafiti na kitaaluma.

Hayo yamebainiswa na Mwenyekiti wa Baraza la Chuo Kikuu Cha Sokoine Cha Kilimo  SUA Mhe. Jaji Mohamed Chande Othman katika ziara yake chuoni hapo na kusema endapo SUA itabuni vyanzo mbadala vya mapato kitaweza kufanya shughuli zake pasipo kutegemea fungu kutoka Serikali kuu ambayo  haitoshelezi mahitaji.

Mwenyekiti Chande amesema kwa sasa Chuo Kikuu cha Sokoine Cha Kilimo SUA kinategemea ruzuku toka Serikalini,Fedha kutoka kwa washirika wa ndani na nje ya Nchi.

Kwaupande wake Makamu wa Mkuu wa Chuo Kikuu cha Sokoine cha Kilimo  SUA  Prof. Raphaeli Chibunda amesema kwa sasa chuo kinatekeleza miradi mbambali ikiwemo ukarabati wa miundombinu ya kufundishia, karakana pamoja na maabara ambazo zitawezesha wanafunzi kujifunza kwa vitendo.

Akiwa katika Shamba la Mafunzo Kitengo cha Ufugaji Samaki na Kilimo Mhe. Jaji Chande  amesema chuo kinatakiwa kuweka usimamizi wakutosha ili kuhakikisha wanafunzi wote wanaosoma kozi za kilimo na ufugaji wanapata mafunzo muhimu ambayo yatawasaidia pindi watakapo maliza ili waweze kujiajiri na kuisaidia jamii.

Mwnyekiti huyo wa Baraza la Chuo la SUA pia ametembelea Maktaba ya Taifa ya Kilimo, Maabara  ya TEHAMA iliyopo Kampasi ya Edward Moringe Sokoine na anatarajia kuendelea na ziara yake leo siku ya Alhamisi Disemba 17 kwa kutembelea Kituo kipya cha Stendi ya Daladala kilichopo eneo la Mafiga mkoani Morogoro.