SUA tayari katika Maonesho ya Vyuo Vikuu viwanja vya Mnazi Mmoja Dar es Salaam kutoa Ushauri na Udahili

 

Na: Farida Mkongwe, Dar es Salaam       

Wanafunzi wanaotaka kujiunga na vyuo vikuu wametakiwa kufika katika banda la Chuo Kikuu cha Sokoine cha Kilimo SUA lililopo kwenye Maonesho ya Vyuo Vikuu yanayofanyika katika viwanja vya Mnazi Mmoja jijini Dar Es Salaam ili waweze kupata ushauri na udahili wa kujiunga na chuo hicho.

Wito huo umetolewa na Mkuu wa Kitengo cha Ugani cha Taasisi ya Elimu ya Kujiendeleza ICE kilichopo SUA Dkt. Innocent Babili ambaye ni Mratibu wa Maonesho ya 15 ya Elimu ya Juu, Sayansi na Teknolojia upande wa SUA wakati akizungumza na SUAMEDIA katika maonesho hayo.

Dkt. Babil amesema maandalizi yote kwa ujumla yamekamilika na kwamba wananchi watakaofika katika banda hilo la SUA hususan wanafunzi wanaotaka kujiunga na vyuo vikuu ambao ndio walengwa wakifika watajionea teknolojia mbalimbali zilizopo SUA sanjari na kudahiliwa kwa wale waliokidhi vigezo.

“Lengo kubwa hapa ni kuwasaidia vijana waliomaliza kidato cha sita ambao wanataka kujiunga na vyuo vikuu, hapa kuna fursa ya kuweza kupata udahili wa moja kwa moja lakini pia watapata ushauri wa kozi zilizopo na faida zake katika ulimwengu huu wa sayansi na teknolojia”, alisema Dkt. Babil

Maonesho hayo ya wiki moja ya Elimu ya Juu, Sayansi na Teknolojia ambayo yamebeba kauli mbiu isemayo “ Nafasi ya Elimu ya juu katika kuleta mabadiliko ya kiuchumi na maendeleo endelevu”, yameanza rasmi leo Agosti 31 na yatakamilika Septemba 5 mwaka huu.