Watumishi SUA hakikisheni mnaaminika kazini - Prof. Mahonge

 Na Gerald Lwomile

Watumishi wa Chuo Kikuu cha Sokoine cha Kilimo (SUA) wametakiwa kuhakikisha wanaaminika na kutegemeana katika utumishi wao ili kuleta tija na ufanisi kazini.

Mwenyekiti wa Kamati ya Kuthibiti Uadilifu SUA Prof. Christopher Mahonge akifafanua jambo (Picha zote na Gerald Lwomile)

Akizungumza na watumishi wa SUA Kampasi ya Mizengo Pinda iliyoko Wilayani Mlele Mkoani Katavi hivi karibuni, Mwenyekiti wa Kamati ya Kuthibiti Uadilifu SUA Prof. Christopher Mahonge amesema kuna baadhi ya watumishi wamekuwa na changamoto ya kukosa uaminifu na kushindwa kufikia malengo ya taasisi.

Amesema mtumishi anapokuwa ni mwaminifu na tegemeo katika kazi yake inaisaidia Taasisi kuwa na uhakika kuwa jakumu aliyopangiwa mtumishi yatatekelezwa kwa wakati na kusaidia Taasisi kufikia malengo yake.

Mwenyekiti wa Kamati ya Kuthibiti Uadilifu SUA Prof. Christopher Mahonge aliyekaa (katikati) akiwa katika picha ya pamoja na watumishi wa Kampasi ya Mizengo Pinda, wa pili kutoka kushoto waliokaa ni Naibu Rasi wa Kampasi ya Mizengo Pinda Mipango, Utawala na Fedha Prof. Jeremiah Makindara

Prof. Mahonge amesema watumishi wanapokuwa katika eneo moja mahusiano si yale mazuri pekee kwani kuna wakati watumishi hutofautia lakini cha kujiuliza ni je mara baada ya kutofautiana nini kinafanyika baadae ili kuhakikisha Taasisi inaenda kwa pamoja.

Awali akimkaribisha Mwenyekiti wa KKU – SUA ili kuzungumza na wafanyakazi wa Kampasi ya Mizengo Pinda, Naibu Rasi wa Kampasi ya Mizengo Pinda Mipango, Utawala na Fedha Prof. Jeremiah Makindara amesema KKU inafanyakazi nzuri katika kuhakikisha watumishi wanajua wajibu wao katika kazi.

Naibu Rasi wa Kampasi ya Mizengo Pinda Mipango, Utawala na Fedha Prof. Jeremiah Makindara akimkaribisha Mwenyekiti wa KKU kuzungumza na watumishi

Amesema ni wajibu wa watumishi kuzingatia uadilifu kazini na katika jamii kama inavyoelezwa au kufafanuliwa na kamati hiyo kwani huo ndiyo mwongozo wa utumishi wa umma.