Mkurugenzi Mbarali aishukuru Serikali ya Dkt. Samia kuwapatia pikipiki Maafisa Ugani wakainue uzalishaji.

 Na: Amina Hezron,Mbeya.

Serikali kupitia Wizara ya Kilimo na Mifugo imenunua Pikipiki 61 kwaajili ya kuwapatia Maafisa Ugani katika halmashauri ya Wilaya ya Mbarali ili kuwasaidia kuwafikia walengwa kwa haraka na kuwapatia ushauri wa kitaalamu utakaosaidia kuongeza uzalishaji wa mazao katika halmashauri hiyo.

 

Mkurugenzi Mtendaji wa Halmashauri ya Wilaya ya Mbarali mkoni Mbeya Mwl. Missana Kwangura akimuanesha Mwandishi wa SUAMEDIA Amina Hezron Pikipiki hizo tayari kwa kugawawi kwa Maafisa Ugani. 

Hayo yameelezwa na Mkurugenzi wa Halmashauri ya Wilaya ya Mbarali mkoni Mbeya Mwl. Missana Kwangura alipokuwa akizungumza na SUAMEDIA ofisini kwake na kuishukuru Serikali ya Mhe. Dkt. Samia Suluhu Hassani kwakuona changamoto wanazokumbana nazo wataalamu wa Ugani ambapo na wao kama halmashauri wamenunua pikipiki nyingine mbili kwa mapato ya ndani.

Ameeleza kuwa asilimia 85 ya mapato katika Halmashauri ya Wilaya ya Mbarali inategemea kutoka kwenye mapato ya ushuru wa mazao ambayo ni Mpunga au Mchele, Alizeti na Mahindi kidogo huku ikitegemea pia kwa kiasi kikubwa kutoka kwenye upande wa mifugo hivyo pikipiki hizo zitasasaidia wakulima wengi kufikiwa na kuongeza uzalishaji hivyo halmashauri katika kufikia malengo yake katika ukusanyaji wa mapato.

“Wananchi watakapokuwa wanapewa ushauri wa kitaalamu kuhusu mbinu bora za kilimo inamaa watazalisha zaidi kwa wafugaji pia watapata ushauri kuhusu ufugaji bora na kupunguza magonjwa ya mifugo yao maana yake watakuwa wanawapa ushauri na kuwafikia pamoja na kutibu kwa haraka na kuongeza mali” alisema Mwl. Kwangura.

Aidha ameongeza kuwa pikipiki hizo zitakuwa na manufaa makubwa ya kuwarahisishia usafiri wa ndani ya kata na vijiji vyao lakini pia kufika makao makuu ya wilaya kwaajili ya vikao ambavyo hufanyika kila baada ya miezi mitatu ili kupeana mrejesho wa mafanikio na changamoto wanazokumbana nazo.

Mkurugenzi Mtendaji wa Halmashauri ya Wilaya ya Mbarali mkoni Mbeya Mwl. Missana Kwangura akizungumza na  Mwandishi wa SUAMEDIA Amina Hezron kuhusu pikipiki hizo ofisini kwake. 

“Pikipiki hizi ambazo zimetolewa na Wizara  tunashukuru kuwa zimeshafika tulimuita mtaalamu kutoka Wakala wa Ufundi na Umeme (TAMESA) kutoka mkoani Mbeya tayari ameshazikagua na kuziona zipo sawa hivyo tunafanya utaratibu wa kukamilisha kuweka  namba za usajili ili tuweze kuwagawia wahusika  kama ilivyokusudiwa”,alisema Mwl. Kwangura.

 Wilaya ya Mbarali ina jumya ya Maafisa Ugani 110 wakiwemo maafisa kilimo 77 maafisa mifugo 33 na kwa mwaka wa fedha ulioisha 2022/2023 Halmashauri ilinunua pikipiki kumi na tatu kwaajili ya maafisa kilimo haohao na kwa lengo hilohilo, hivyo wanaishukuru  Serikali kwa kuunga mkono jitihada zao ili kuweza kuhakikisha maafisa hao wanafanya kazi na kutekeleza majukumu yao vizuri.