SUA yafanya Ziara za Utalii katika Hifadhi za Udzungwa na Mikumi

Na. Vedasto George.

Chuo  Kikuu cha Sokoine cha Kilimo SUA  kupitia Chama cha Wafanyakazi  SUA Main Administrative Staff Community (SUMASCO) wamefanya ziara ya siku mbili  ya kutembelea  vivutio vya utalii  katika Hifadhi za Udzungwa  na Mikumi kwa kujifunza na kujionea vivutio  vilivypo nchini ikiwemo kuongeza pato la  Taifa.

 

Mwenyekiti wa Chama cha Wafanyakazi  SUMASCO Bi Josephine Lwiza amesema kuwa Watanzania wametakiwa kujiwekea mazoea ya kufanya Utalii wa ndani mara kwa mara katika kuhakikisha  vivutio vya utalii  vilivypo hapa nchini vinatangazika  na kuwa mabalozi wazuri wa kutangaza  maeneo ya utalii yaliyopo  katika hifadhi zilizopo nchini.

“ kuna mambo mengi ya kujifunza sisi SUMASCO leo tumetembelea Udzungwa na Mikumi lakini pia siku nyingine tutaenda katika hifadhi nyingine  na yote haya tunayafanya ili kuunga mkono juhudi za Serikali katika kutangaza  vivutio vya utalii.”Amesema Josephine Lwiza.

Aidha ameishukuru Menejimenti ya Chuo  Kikuu cha Sokoine cha Kilimo (SUA) kwa kuendelea  kutoa fursa  kwa watumishi  wake kwenda kufanya utalii wa ndani na kuwa jambo ilo litasaidia kuongeza utendaji kazi  katika Taasisi hiyo kwa kuzingatia   moja ya shughuli zinazofanya na Chuo  ni pamoja na  masuala ya utalii.

Kwaupande wao Bw. Anderson Charles na Bw. Omar Tunga kutoka SUA  wamesema kwa muda mrefu SUMASCO kama Chama kimekuwa kikifanya  shuguli za utalii katika maeneo mbalimbali   ya nchi kwa dhumuni moja la  kuiunga mkono Serikali katika kutangaza  utalii uliopo nchini.

“Tumefanya hivi kutembelea maeneo ya utalii wakati tunajiandaa na  kikao chetu cha mwaka  na tunatarajia kwenye kikao hicho kubadili katiba yetu ili iweze kuwa rafiki na  madhumuni ya umoja wetu ni kusaidiana  pale mtumishi mwenzetu atakapo pata shida”. Amesema Bw. Tunga

Naye Charles Kisangilo ambaye ni muongoza watalii Hifadhi ya Taifa ya Udzungwa amebainisha maeneo  yaliyotembelewa kuwa  ni Maporomoko ya  maji Sanje  na  maeneo ya kihistoria  pamoja na Msitu wa Udzungwa.

Aidha Bw. Karoli Shirima ambaye pia ni muongoza watalii katika hifadhi ya Taifa Mikumi alipokuwa akitoa historia ya jinsi ya kuanzishwa hifadhi hiyo amesema kuwa  Hifadhi hiyo ilianzishwa  mwaka 1964  ikiwa na Kilometa za Mraba zipatazo 1070 lakini ilipofika mwaka 1970 hifadhi hiyo iliongezwa ukubwa   na kuifanya hifadhi hiyo kuwa na ukubwa wa  kilimeta 2330.

Ameongeza kuwa Hifadhi ya Taifa Mikumi kwasasa  ni hifadhi ya tisa  kwa ukubwa baada ya kuongezwa vijiji  vilivyokuwa Jirani na hifadhi hiyo pia ameongeza katika hifadhi hiyo kuna  jamii mbalimbali za Wanyama  ikiwemo Simba, Tembo,Twiga  na Swala.