SUA na Serikali ya Tanzania kusaidia ongezeko la uzalishaji wa Mbao nchini

 

Na: Tatyana Celestine

Chuo Kikuu cha Sokoine cha Kilimo SUA kupitia Mradi wa Sekta ya Misitu (Wood cluster) kwa kushirikiana na Serikali  ya Tanzania kimefannya tafiti zinazoweza kusaidia ongezeko la uzalishaji wa mazao ya misitu kwa upande wa mbao ili kutokomeza uharibifu wa misitu nchini.

Mradi huo ambao umelenga makundi yanayojihusisha na misitu yakiwemo viwanda, walishaji, watumiaji, na wauzaji wa mbao umekuwa chachu katika kuibua njia zitokanazo na tafiti hizo na kusaidia kutatua tatizo la uharibifu wa misitu pia kuboresha njia bora za kuinua uzalishaji wa mbao kulingana na uhitaji wa taifa.

Akizungumza wakati wa kufungua warsha iliyolenga kusaidia kupunguza upungu wa mahitaji ya mbao Tanzania leo 27/11/2020 Profesa Mshiriki Idara ya Uchumi Misitu na Mazingira ambaye ni Mratatibu wa kitaifa wa mradi Prof. Felista Mombo amebainisha kuwa Tanzania inaupungufu wa mbao unaokaribia mita kyubiki milioni 19.5 ambao ni mkubwa ikilinganishwa na kiasi kinachozalishwa nchini.

Kwa upande wake Kamishna Mhifadhi wa Program za Misitu Tanzania Profesa Dos Santos Silayo amesema kuwa Serikali ya Tanzania imeona kuwa ni fursa nzuri kwa mradi huo kwani umeweza kukutanisha watafiti wa ndani na nje ya nchi katika sekta ya misitu hivyo utafiti huo umeweza kuzalisha wataalamu Zaidi wa utafiti ambao wamekuwa wakifanya tafiti katika maeneo ya masoko, ukuzaji wa miti mashambani, ushirikishwaji wa jamii na kuonesha ushiriki wa Tanzania katika soko la kimataifa.

 Akizungumzia Chuo Kikuu cha Sokoine cha Kilimo SUA katika ushirikishwaji wake kwenye mradi huo, Mratibu Msaidizi Profesa Yonika Ngaga amesema kuwa SUA imejikita kutoa elimu kwa wanafunzi wa Uzamili na Uzamivu ambao wanafanya tafiti na kurudisha matokeo ambayo yanawasilishwa katika ngazi ya vijiji na taifa na kutokana na matokeo ya tafiti hizo tayari SUA imetengeneza mtaala ambao utasaidia kufundishia wanafunzi madarasani

 Mradi huo wa miaka mitano ambao umelenga kusaidia kupunguza upungu wa mahitaji ya mbao Tanzania ulianza rasmi 2017 na unategemea kumalizika 2021, umeshirikisha jumla ya nchi 4 ambazo ni Ethiopia,Ujerumani,Uganda na Tanzania.