SUA KUBORESHA LISHE ZA WATU WA RIKA MBALIMBALI

 

Na: Farida Mkongwe

Chuo Kikuu cha Sokoine cha Kilimo SUA kupitia Mradi wa Chakula na Kilimo Asilia na Lishe Anuwai unaojulikana kwa jina la FOOD and Local, Agricultural, and Nutritional Diversity (FOODLAND) kimekusudia kuboresha lishe za watu wa rika mbalimbali sanjari na kuleta tija katika uzalishaji wa mazao ya kilimo.

Mkurugenzi wa Kurugenzi ya Uzamili, Utafiti, Uhaulishaji wa Teknolojia na Ushauri wa Kitaalam Prof. Esron Karimuribo waliokaa wa pili kulia akiwa na washiriki wa mkutano wa FOODLAND

Kauli hiyo imetolewa na Mkurugenzi wa Kurugenzi ya Uzamili, Utafiti, Uhaulishaji wa Teknolojia na Ushauri wa Kitaalam Prof. Esron Karimuribo wakati akifungua mkutano wa uzinduzi wa Mradi huo Novemba 19, 2020 mjini Morogoro.

Prof. Karimuribo amesema Mradi huo wa FOODLAND utasaidia kuinua uchumi wa kati na kwamba wanategemea tafiti zinazofanywa na SUA zitasaidia kuongeza uzalishaji hasa katika kipindi hiki ambapo malighafi zinahitajika katika kuendeleza viwanda vilivyopo nchini.

"Katika kuinua Uchumi wa Kati tunategemea kuongeza tafiti na tafiti hizo tunatamani zisiishie kwenye machapisho bali ziwafikie wanajamii na taifa kwa ujumla ili ziweze kuwa na matokeo makubwa katika kubadilisha maisha ya watanzania", alisema Prof. Karimuribo.

Akizungumza katika mkutano huo, Mratibu wa Mradi huo kwa upande wa Tanzania Prof. Susan Msolla amesema lengo lao kubwa ni kuboresha lishe ya watanzania pamoja na kutoa elimu itakayowawezesha watanzania kutumia vyakula vya aina mbalimbali kwa lengo la kujenga afya zao.

"Nia kubwa ya Mradi huu ni kuboresha lishe ya watu, tunategemea kupitia mradi huu tutatoa elimu na kupata takwimu za jinsi watu wanavyozalisha, pia tunataka kujua sababu ni kwa nini watu wanashindwa kula vyakula vya aina nyingi", amesema Prof. Msolla.

Kwa upande wake Kaimu Rasi wa Ndaki ya Kilimo Dkt. Rashid Suleiman amesema mradi huo umekuja wakati muafaka kwani tafiti zitakazofanyika zitakisaidia chuo cha SUA na Taifa kwa ujumla katika kuongeza uzalishaji wa chakula.

Awali akitoa akitoa maelezo kuhusu Mradi wa FOODLAND,  Mkurugenzi wa Taasisi ya elimu ya Kujiendeleza (ICE) ambaye pia ni mshiriki wa Mradi huo Prof. Dismas Mwaseba amesema mradi huo unatekelezwa katika nchi mbalimbali duniani

Amesema "kuna taasisi mbalimbali duniani zinazoshiriki katika mradi huu zikiwemo nchi sita za Afrika na nyingine za Ulaya, kwa Afrika mradi unatekelezwa katika nchi za Tanzania, Kenya, Uganda, Ethiopia, Tunisia na Morocco".

Mradi wa FOODLAND ambao umezinduliwa leo umeanza rasmi mwezi Septemba mwaka huu na utafikia kilele mwezi Agosti mwaka 2024.